ნაციონალური მოძრაობის თავმჯდომარე, ნიკა მელია აცხადებს, რომ თბილისში გასამართი აქცია, რომელიც არჩევნების შედეგების გაპროტესტებას უკავშირდება, ძალაში რჩება, თუმცა მისი თქმით, ექსპრეზიდენტის, მიხეილ სააკაშვილის მდგომარეობის გართულების გამო, გეგმები "დროებით შეცვალეს".

"თბილისში გასამართი აქცია, რა თქმა უნდა, ძალაში რჩება და ამ ყველაფერს იხილავს საზოგადოება. მაგრამ ნომერ პირველი ამოცანა ჩემთვის, მიუხედავად იმ უდიდესი სიყალბისა, რომლის დემონსტრირება მოახდინა ხელისუფლებამ 30 ოქტომბერს — ძალადობით წაიღო, მოიპარა არჩევნები და კიდევ ერთხელ მიიტაცა ხელისუფლება, რა თქმა უნდა, ყველა საქმის კურსში ვართ, რომ ეს ასე არის და ამ ყველაფრისთვის ის პასუხს აგებს აუცილებლად უახლოეს პერიოდში და ამ ბრძოლაში ჩვენ ვრჩებით, მაგრამ მე მინდა, მიხეილ სააკაშვილი ამ ყველაფრის პარალელურად იყოს ცოცხალი", — განაცხადა მან მთავარი არხის ეთერში.

ნიკა მელიამ ხვალ, 6 ნოემბერს აქცია რუსთავში დააანონსა. მისი თქმით, 17:00 საათზე შეიკრიბებიან, თუმცა არ დაიშლებიან, სანამ სააკაშვილს სამოქალაქო საავადმყოფოში არ გადაიყვანენ. აღსანიშნავია, რომ მანამდე, 6 ნოემბერს ოპოზიციას აქცია დაგეგმილი ჰქონდა თბილისში. როგორც მელიამ აღნიშნა, დამატებით გეგმებზე ის მოგვიანებით ისაუბრებს, რადგან არ სურს, რომ "ივანიშვილის დამნაშავე ხელისუფლებას ცხოვრება გაუადვილოს". მისივე თქმით, სააკაშვილის სამოქალაქო, მულტიფუნქციურ კლინიკაში უნდა გადაიყვანონ მანამ, სანამ ის "კოლაფსში ჩავარდება".

სააკაშვილი პირველ ოქტომბერს დააკავეს. ის ბრალს არ აღიარებს და უკვე 36-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.

ოპოზიციამ აქციები უკვე გაიმართა სხვადასხვა ქალაქში, მათ შორის, ბათუმში, ზუგდიდსა და ქუთაისში. პარალელურად, მოქალაქეები ყოველდღიურად იკრიბებიან რუსთავის ციხესთან და მესამე პრეზიდენტის კლინიკაში გადაყვანას, ასევე, მის გათავისუფლებას ითხოვენ.