ბათუმში მიმდინარე აქციაზე ნაციონალური მოძრაობის ლიდერმა, ნიკა მელია განაცხადა, რომ ვერც ერთი ე.წ კანონიერი ქურდი საქართველოში ვერ გაიმარჯვებს და ყველას სახეში "სილა მოხვდება". მან აქციიდან, პირდაპირ ეთერში მიმართა ბათუმელ კრიმინალურ ავტორიტეტს, მინიდა ლავასოღლის და უთხრა, რომ "ყოფას უტირებს".

"ვერცერთი კანონიერი ქურდი ვერ გაიმარჯვებს ამ ქვეყანაში. ვერცერთი კანონიერი ქურდი და ვითომ მაფიოზი, პოლიციელის ზურგსამოფარებული ვერ გაიმარჯვებს. არ მინდა და არ ვიცხოვრებთ იმ ქვეყანაში, სადაც კანონიერი ქურდი და კრიმინალი იქნება დომინანტი. დიახაც, არ იქნება, არ დაბრუნდება 90-იანი წლები, რომელიც დაბრუნდა. ყველა კანონიერ ქურდს სახეში სილა მოხვდება ქართველი ერის და სიამოვნებით გავაკეთებ ამას მე პირადად", — ამბობს მელია.

მისი განცხადებით, არჩევნებში მმართველი პარტია ე.წ კანონიერ ქურდებს იყენებდა და ისინი ცდილობდნენ დაეშინებიათ ადამიანები. მანვე თქვა ისიც, რომ ე.წ კანონიერი ქურდების დამარცხება კვლავ უწევთ და ეს უკვე მე-2 წრეა. თუმცა მისივე შეფასებით, ახლა უფრო გააზრებულია ეს მოქმედება.

"გამარჯვება ქართველ ხალხს, ძირს კანონიერ ქურდები და კანონიერი ქურდების ინსტიტუტი. ყოფას გიტირებთ კანონიერო ქურდებო, აი ყოფას გიტირებთ. კანონიერი ქურდების ჭაჭანი ამ ქვეყანაში ვერ იქნება, არ იქნება, იმიტომ რომ გვინდა თავისუფალ გარემოში გავზარდოთ ჩვენი შვილები და მათ ჰქონდეთ შესაძლებლობა, არჩევნებზე წავიდნენ ხმის მისაცემად და არ გვინდა ჩვენ შვლებს შემოვუნახო ის დრო და იმ დროში ვაცხოვროთ ჩვენი შვილები, სადაც ხმის მიცემასთან ერთად ხმის დაცვაც მოუწევთ", — აღნიშნა ნიკა მელია.

ამ წუთებში ბათუმში ოპოზიციის აქცია მიმდინარეობს. იქ შეკრებილები არიან ოპოზიციური პარტიების ლიდერები, მათ შორის, ნიკა მელია, მამუკა ხაზარაძე, ბადრი ჯაფარიძე და ელენე ხოშტარია.

არჩევნების შედეგების გამოცხადების შემდეგ, ოპოზიციამ აქციები მთელი საქართველოს მასშტაბით დააანონსა. დღეს, 2 ნოემბერს ოპოზიციის მხარდამჭერები ბათუმსა და რუსთავში იკრიბებიან. ხვალ კი აქცია იქნება ზუგდიდშიც. რაც შეეხება დედაქალაქს, თბილისში აქცია 6 ნოემბერს ჩატარდება.