რუსთავი 2-ის დამფუძნებლები, დავით დვალი და ჯარჯი აქიმიძე განცხადებას ავრცელებენ, სადაც საუბარია რ2-ის ამჟამინდელი მფლობელების შეთავაზებაზე, ენმ-ზე, ენმ-ის ყოფილ წევრებზე და ქართულ ოცნებაზე:

"აშკარაა ნაძარცვი ქონების გადანაწილებისა და თანამშრომლების გამოყენებით დანაშაულებრივი ქმედებების გათეთრების მცდელობა. დანაშაულის ლეგიტიმაცია ვერ მოხდება, ვინაიდან საქმე რეზონანსულია და ყველას კარგად მოეხსენება, რომ 2004 წელს რუსთავი 2-ის 60% ხელისუფლებამ იძულებით დაათმობინა დამფუძნებლებს."

დვალი-აქიმიძის მოსაზრებით, ძმები ყარამანიშვილები სააკაშვილის ფრთას წარმოადგენენ და მათი წინადადება წინადადება წილების 40% თანამშრომლებისთვის დათმობის თაობაზე არის მცდელობა - "გაზარდონ საკუთარი პოზიციების მოჩვენებითი ლეგიტიმაცია სტრასბურგის პროცესში."

რუსთავი 2-ის დამფუძნებლებს მიაჩნიათ, რომ ნაციონალური მოძრაობის ყოფილი წევრები, გიგი უგულავა და გიგა ბოკერია არის მეორე ფრთა, რომელსაც ტელევიზიის მენეჯმენტი წარმოადგენს. დვალი-აქიმიძის აზრით, მენეჯმენტის კონტრწინადადება შპს-ს შექმნის თაობაზე, ასევე, გულისხმობს თანამშრომლების გამოყენებით დამყარდეს კონტროლი ტელევიზიაზე.

დვალს და აქიმიძეს მიაჩნიათ, რომ ორივე აღნიშნულ შემთხვევაში, რუსთავი 2-ის თანამშრომლების უმრავლესობა ვერანაირ გავლენას ვერ მოახდენს მიმდინარე პროცესებზე. მათივე განცხადებით, ერთ შემთხვევაში თანამშრომლები "გაისვრებიან და გახდებიან ინტრიგის მსხვერპლი," მეორე შემთხვევაში კი, "მათ გამოიყენებენ შირმად".

ტელეკომპანიის დამფუძნებლები თვლიან, რომ შესაძლოა, არსებული სიტუაციიდან ამგვარ გამოსავალს პოზიტიურად უყურებს ხელისუფლება:

"თვალი გავუსწოროთ სიმართლეს: ამ სქემის წარმატებით განხორციელების შემთხვევაში დამოუკიდებელი რუსთავი 2-ის მაგივრად მივიღებთ კონტროლირებადი პარტიის მიერ კონტროლირებად ტელევიზიას!"

დავით დვალი და ჯარჯი აქიმიძე აცხადებენ, რომ შეუძლებელია ამ საქმის სამართლიანად დასრულება, სანამ არ აღდგება მათი, როგორც რუსთავი 2-ის დამფუძნებლების ორი შელახული ფუნდამენტური უფლება - კერძო საკუთრების ხელშეუხებლობა და სიტყვის გამოხატვის თავისუფლება.