პარლამენტის წინ ყოფილი პრეზიდენტის, მიხეილ სააკაშვილის მხარდამჭერ აქციაზე ხმაური იყო. როგორც აქციის მონაწილეები ჟურნალისტებთან ამბობენ, მათ კარვების გაშლის უფლება არ მისცეს.

გავრცელებულ კადრებში ჩანს, რომ პოლიციამ აქციის ერთ-ერთი მონაწილე მანქანაში ჩასვა და ტერიტორიიდან გაიყვანა. უცნობია, დააკავეს თუ არა ის. On.ge აღნიშნულზე შინაგან საქმეთა სამინისტროს დაუკავშირდა და პასუხს მიღებისთანავე შემოგთავაზებთ.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის პენიტენციურ დაწესებულებაში უკვე 1 თვეა შიმშილობს.

29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებს და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები.

გაიგე მეტი: