პარლამენტში ფრაქცია შარლ მიშელის რეფორმების ჯგუფმა სახელი შეიცვალა და რეფორმების ჯგუფი გახდა. აღნიშნულზე დღეს ბიუროს სხდომაზე პარლამენტის თავმჯდომარემ, კახა კუჭავამ განაცხადა.

როგორც ფრაქციის წევრმა, ტარიელ ნაკაიძემ On.ge-სთან განაცხადა, სახელის ცვლილებაზე საუბრები ფრაქციაში არჩევნების მეორე ტურამდე ჰქონდათ, მიზეზი კი ისაა, რომ რეფორმების სპექტრი ფართოვდება.

"ჩვენ უფრო ფართო მიმართულებით ვმუშაობთ, ზოგადად. თავის დროზე, როდესაც შეიქმნა, აქტუალური თემა იყო, ჩვენ ერთგული ვიყავით შარლ მიშელის დოკუმენტისა და დღესაც ვრჩებით იმ მოცემულობისა, რომელიც პრაქტიკულად მაშინ იყო. მეორე ტურის არჩევნებამდე გვქონდა ამაზე შიდა საუბრები ფრაქციაში და გადავწყვიტეთ, შეგვეცვალა, უფრო ფართოდ წარმოგვედგინა ჩვენი სახე საქართველოს პარლამენტში, როგორც რეფორმების ჯგუფი", — თქვა მან.

ფრაქცია შარლ მიშელის რეფორმების ჯგუფი 3 ივნისს შეიქმნა. როგორც გიორგი ვაშაძემ განაცხადა, ფრაქციის სახელწოდება მოდის იმ შეთანხმებიდან, რომლითაც მივიდნენ პარლამენტში და რომლის რეალიზებაზეც აიღეს პასუხისმგებლობა.