პრემიერმინისტრ ირაკლი ღარიბაშვილის განცხადებით, წინასწარი მონაცემებით, ქართულმა ოცნებამ ყველა მუნიციპალიტეტში გაიმარჯვა. ის კახა კალაძეს ულოცავს და ამბობს, რომ ახლა მშვიდად უნდა დაელოდონ ცესკოს მონაცემებს.

"მინდა ყველას მოგილოცოთ მეორე ტურის გამარჯვებით დასრულება. დიდი მადლობა ჩვენს ხალხს და ჩვენს მხარდამჭერებს. მადლობა ჩვენს ხალხს, მადლობა ყველაფრისთვის, თქვენ მადლობა, მადლობა უფალს, ძალიან კარგად, მშვიდად ჩატარდა არჩევნები და ჩვენ ყველა მუნიციპალიტეტში გავიმარჯვეთ წინასწარი მონაცემების მიხედვით. ახლა მშვიდად უნდა დაველოდოთ საბოლოო მონაცემების გამოცხადებას და მე მინდა მივულოცო კახა კალაძეს გამარჯვება თბილისის მერის თანამდებობაზე", — თქვა ღარიბაშვილმა.

გორბის (იმედი) მიერ ჩატარებული იმედის ეგზიტპოლის შედეგები ასეთია:

  • კახა კალაძე — 57,2%
  • ნიკა მელია — 42,8%

რადიკალურად განსხვავებული შედეგებია მთავარი არხის მიერ ჩატარებული ეგზიტპოლით, რომლის მიხედვითაც ნიკა მელია ლიდერობს, ეგზიტპოლის შედეგები შემდეგნაირად განაწილდა:

  • ნიკა მელია — 51%;
  • კახა კალაძე — 49%.

მეორე ტური 15 თვითმმართველ თემსა და 5 თვითმმართველ ქალაქში, მათ შორის, თბილისში გაიმართა. ასევე, 24 საარჩევნო ოლქში, რომლის შედეგად აირჩევა 42 მაჟორიტარი. მერობისა და მაჟორიტარობისთვის ჯამში 9 პარტიის, ასევე, ორი დამოუკიდებელი კანდიდატი იბრძვის.

დღის განმავლობაში გავრცელდა არაერთი ინფორმაცია დარღვევების, მათ შორის, ამომრჩეველზე ზეწოლისა და სავარაუდო მოსყიდვის შესახებ. ასევე, მოხდა დაპირისპირებები საარჩევნო უბნებთან. კოორდინატორები და აგიტატორები თავს დაესხნენ და ფიზიკური შეურაცხყოფა მიაყენეს ჟურნალისტებსაც.