პარლამენტის პირველი ვიცე-სპიკერი, გია ვოლსკი პრემიერმინისტრის, ირაკლი ღარიბაშვილის მიერ სააკაშვილის შიმშილობაზე გაკეთებულ განცხადებას იმით ხსნის, რომ ვერცერთ ადამიანს შიმშილობას ვერ დაუშლი.

ვოლსკის მტკიცებით, მთავარი, რაც ღარიბაშვილმა ამ განცხადებით თქვა, არის ის, რომ სახელმწიფო არ დაუშვებს სააკაშვილის ჯანმრთელობის და სიცოცხლის უფლების შელახვას.

"ადამიანს ვერ დაუშლი, რომ თავის თავს... მაშინ შიმშილობაც დაუშალეთ, ეს იყო ეს თემა, როცა ადამიანი იწყებდა შიმშილობას, ძალით გაუღებდნენ პირს და საჭმელს ასხამდნენ შიგნით სააკაშვილის დავალებით და სააკაშვილის მიერ შექმნილი სისტემით, ამის უფლება სახელმწიფოს არ აქვს. ადამიანს აქვს უფლება იშიმშილოს და თავის თავი ასეთ ცუდ მდგომარეობაში ჩააყენოს რაღაც კონკრეტული მიზნით. კონკრეტულად სააკაშვილს არანაირი მიზანი ამასთან დაკავშირებით არ განუცხადებია, მაგრამ, მთავარი, რაც თქვა პრემიერმინისტრმა, არის ის, რომ არ დაუშვებს სახელმწიფო მისი ჯანმრთელობის და მითუმეტეს, მისი სიცოცხლის უფლების შელახვას", — აცხადებს ვოლსკი.

გუშინ, 28 ოქტომბერს ექსპრეზიდენტ მიხეილ სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 29 დღეა შიმშილობს