Manifest.ge-ზე მოქალაქეების ნაწილი პრეზიდენტ სალომე ზურაბიშვილისა და ექსპრეზიდენტ გიორგი მარგველაშვილის შეხვედრის მოთხოვნით ხელმოწერებს აგროვებს. განცხადებაში წერია, რომ ქვეყანაში არსებული ვითარების — პოლარიზაციის, მესამე პრეზიდენტის შიმშილობის, საზოგადოების გახლეჩის მოგვარების გზა პრეზიდენტის მხრიდან აქტიური დიალოგი და ქმედითი ნაბიჯების გადადგმაა.

"ვთხოვთ, საქართველოს მოქმედ პრეზიდენტს, ქალბატონ სალომე ზურაბიშვილს და მეოთხე პრეზიდენტს, ბატონ გიორგი მარგველაშვილს, შეხვდნენ ერთმანეთს, რათა განიხილონ ქვეყანაში არსებული ვითარება და იმსჯელონ გამოსავლის გზებზე", — წერია განცხადებაში.

პეტიციის თანახმად, პრეზიდენტებს შორის დისკუსიის მთავარი საკითხი მიხეილ სააკაშვილის შიმშილობა უნდა იყოს. განცხადებაში აღნიშნულია, რომ მოქმედ და ყოფილ პრეზიდენტებს შეუძლიათ, რომ პროცესში ჩართონ საზოგაოება და გამოვიდნენ მნიშვნელოვანი ინიციატივებით.

"პრეზიდენტის ინსტიტუტი არ ექვემდებარება პარტიულ ინტერესებს და მისი პირდაპირი კონსტიტუციური მოვალეობაა ქვეყნის ერთიანობასა და ეროვნულ დამოუკიდებლობაზე ზრუნვა. ვფიქრობთ, რომ ქვეყნის მოქმედმა პრეზიდენტმა, მის წინამორბედთან (მეოთხე პრეზიდენტთან) ერთად, უნდა დაიწყოს აქტიური დიალოგი და ქმედითი ნაბიჯების გადადგმა საზოგადოების კონსოლიდაციის გზებზე, რა დროსაც დისკუსიის ერთ-ერთი ცენტრალური საკითხი მესამე პრეზიდენტის პენიტენციურ დაწესებულებაში ყოფნა და შიმშილობა უნდა იყოს. მათ ასევე აქვთ შესაძლებლობა ამ პროცესში საზოგადოება ჩართონ და ქვეყნისთვის მნიშვნელოვანი ინიციატივებით გამოვიდნენ", — წერია განცხადებაში.

პეტიციას ამ დროისთვის 369 ადამიანი აწერს ხელს.