ნატო-ს ყოფილი გენერალური მდივანი, ანდერს ფოგ რასმუსენი აცხადებს, რომ საქართველოში არსებული პოლიტიკური არასტაბილურობა ხელს უშლის ნატოში გაწევრიანებას. მისი თქმით, აღნიშნული ვითარება, შესაძლოა, საქართველოს ალიანსში გაწევრიანების მოწინააღმდეგეებმა გამოიყენონ.

"მიმდინარე პოლიტიკური კრიზისი შეიძლება ნატოს იმ წევრებმა გამოიყენონ საქართველოს ალიანსში გაწევრიანების საწინააღმდეგოდ, რომლებიც უკვე სკეპტიკურად არიან განწყობილი. მათ შეუძლია შიდაპოლიტიკური დაპირისპირებები კიდევ ერთ დამატებით არგუმენტად გამოიყენონ იმისთვის, თუ რატომ არ უნდა მიიწვიონ საქართველო ნატოში. ჩემი რჩევა, ცხადია, ის არის, რომ მთავრობამ ქვეყანაში პოლიტიკურ სიტუაციის დასტაბილურება შეძლოს", — აცხადებს რასმუსენი ამერიკის ხმასთან.

ამასთან, ის აღნიშნავს, რომ დემოკრატიულ ქვეყნებში მნიშვნელოვანია ყველამ პატივი სცეს ძალების გადანაწილებას მთავრობას, პარლამენტსა და სასამართლო სისტემას შორის, წინააღმეგ შემთხვევაში კი, საქართველოს გარშემო ეჭვები სულ იარსებებს.