დეპუტატი გიორგი ხელაშვილი ყველაზე დიდი ოპოზიციური პარტიის, ნაციონალური მოძრაობის რეიტინგს კვაზიპოპულარობას უწოდებს და ამას კოვიდპანდემიით ხსნის. ხელაშვილის ლოგიკით, ენმ-ს ამომრჩევლები არა პარტიის "გულმხურვალე მხარდამჭერები" არიან, არამედ კორონავირუსის პანდემიის შედეგად მიღებული ეკონომიკური გაჭირვების გამო რადიკალიზებული მოქალაქეები.

"დღევანდელი ძალთა განაწილება და ნაციონალური მოძრაობის კვაზიპოპულარობა არის გამოწვეული იმ მძიმე ორწლიანი ვითარებით, რაც ქვეყანას თავს მოახვია კოვიდპანდემიამ. ჩვენ ძალიან ხშირად ვივიწყებთ ხოლმე კონტექსტს, რომელშიც ბოლო ორი არჩევნები ჩატარდა. თითქოს ეს არის ჩვეულებრივი, წყნარი გარემო — ეს არის კრიზისი, რომელიც საუკუნეში ერთხელ ხდება. ამ კრიზისის განმავლობაში, ნებისმიერ მმართველი ძალა მსოფლიოს მასშტაბით აწყდება ძალიან დიდ სირთულეებს ხელახლა გამარჯვებაში, ნებისმიერ არჩევნებში.

რომ გადახედოთ არჩევნების გეოგრაფიას მთელ მსოფლიოში, როგორც წესი, მმართველი ძალა გამოიყურება ძალიან სუსტად, ძალიან ხშირად. შესაბამისად, ჩვენთან ვინც მისცა ძირითადად ნაციონალურ მოძრაობას ხმა, ეს იყო არა იმდენად მათი გულმხურვალე მხარდამჭერი, რომლებიც მცირე არიან და უფრო და უფრო მცირდებიან, არამედ ეს არის მოსახლეობა, რომელიც ბოლო ორი წლის განმავლობაში, სრულიად გასაგები მიზეზების გამო — პანდემიის გამოწვევების, ეკონომიკური გაჭირვების გამო არის რადიკალიზებული", — განაცხადა გიორგი ხელაშვილმა პალიტრანიუსის ეთერში.

ხელაშვილის თქმით, იმედი აქვს, რომ ეს იქნება ბოლო არჩევნები, სადაც ქართული ოცნების კონკურენტი ნაციონალური მოძრაობა იქნება.