ჩვენი ცხოვრება უამრავი საიდუმლოთია სავსე. თანამედროვე დროში ფლირტი, ფოტოების გაგზავნა და სექსუალური მიმოწერა ჩვეულებრივი მოვლენა გახდა, თუმცა ვარსკვლავების თავს დატრიალებული ამბების შემდეგ ადამიანებს განცდა გაუჩნდათ, რომ მათი პირადი მიმოწერა და სოციალურ ქსელში აქტიურობის მონაცემები დაუცველია. ასეც რომ არ იყოს, არავინაა დაზღვეული იმისგან, რომ ტელეფონი ვინმეს ხელში აღმოჩნდება და საიდუმლოს შემთხვევით წააწყდება. ეს არამხოლოდ ჩვენ, არამედ ჩვენი თანამოსაუბრისა თუ პარტნიორის პირადი მონაცემების უსაფრთხოებასაც ეხება, ამიტომ საჭიროა თქვენი ტელეფონის დაცვა.

ამისათვის არსებობს სპეციალური აპლიკაციები, რომლებიც ამგვარი ინფორმაციის დამალვაში დაგეხმარებათ. ჩვენ ხუთ საუკეთესოს გაგაცნობთ.

1. Private Photo Vault

ამ პროგრამის დახმარებით თქვენ მარტივად შეძლებთ უცხო თვალისგან ფოტოებისა და ვიდეოების დამალვას. ამისათვის საჭიროა აპლიკაციის გადმოწერა, სისტემის მთავარი ალბომიდან ფოტოების პროგრამის ბაზაში გადატანა და პაროლის დადება.

გადმოწერეთ: Apple Store-დან და Google Play-დან;

2. Best Secret Folder

ამ პროგრამის დახმარებით თქვენ მარტივად შეძლებთ ფოტოებისა და ვიდეოების ისე შენახვას, რომ თქვენ გარდა ვერავინ ნახავს. აღნიშნული პროგრამის მთავარი უპირატესობა ის არის, რომ მისი შემჩნევა სპეციფიკური ლოგოს გამო უცხო თვალისთვის ძალიან რთულია. რაც მთავარია, პროგრამა სანდოა და App Store-ში მისი რეიტინგია 4+.

გადმოწერეთ: App Store-დან;

3. Vaulty

აღნიშნული პროგრამის მთავარი მისია იგივეა, რაც წინა ორის, თუმცა მას სხვა უპირატესობაც გააჩნია. თუკი ტელეფონს დაკარგავთ ან გაგიფუჭდებათ, Photo Vault-ისა და Best Secret Folder-ისგან განსხვავებით, შეგეძლებათ აღადგინოთ ნებისმიერი დაკარგული ფაილი და საიდუმლოდ შენახული ყველა ფოტო თუ ვიდეო დაიბრუნოთ.

გადმოწერეთ App Store-დან და Google Play-დან;

4. Vault for iOS

თუ ზემოთ ჩამოთვლილ პროგრამებს არ ენდობით და უფრო მეტი გარანტიები გჭირდებათ, მაშინ შეგიძლიათ Vault for iOS გადმოწეროთ, რომელსაც ფოტოებისა და ვიდეოების შენახვის გარდა, ალბომის თითის ანაბეჭდით დაცვის ფუნქციაც აქვს.

ამას გარდა, პროგრამას სხვა დამატებითი სერვისებიც გააჩნია, თუმცა მათით სარგებლობა ფასიანია და თვეში $1,99 ღირს, ხოლო წლიურად $19,99 დაგიჯდებათ.

გადმოწერეთ App Store-დან;

5. Vault for Android

ეს პროგრამა ზემოთ ხსენებული Vault for iOS-ის კლონი ნუ გეგონებათ. მისგან განსხვავებით, ამ პროგრამას Recover-ის ფუნქციაც გააჩნია. პლუს, მისი ჩაწერის შემდეგ პროგრამა თქვენს კედელზე კალკულატორის ხატულით გამოჩნდება, რაც მის უსაფრთხოებას ზრდის. ამას გარდა, პროგრამაში ინტეგრირებულია სპეციალური ბრაუზერი, რომელიც იმ კონტენტის დასათვალიერებლად ან გადმოსაწერად შეგიძლიათ გამოიყენოთ, რომელსაც ჩვეულებრივი ბრაუზერით ვერ გარისკავდით.

ამ პროგრამის გადმოწერა შეგიძლიათ Google Play-დან;