ქართული ოცნების ერთ-ერთი ლიდერი, შალვა პაპუაშვილი აცხადებს, რომ ყოფილი პრეზიდენტი არ არის პირველი და არც ბოლო, ვინც შიმშილობს, რის გამოც სასჯელაღსრულების სისტემას საკუთარი მართვის პროტოკოლი აქვს. მისივე თქმით, თუ საჭიროება გახდება, სააკაშვილის სტაციონარში გადაყვანა, ის იუსტიციის სამინისტროს განცხადების შესაბამისად, გადაიყვანენ ციხის საავადმყოფოში.

"მიხეილ სააკაშვილი არ არის პირველი და არ იქნება ალბათ ბოლო, ვინც ციხეში შიმშილობას აცხადებს და ამას თავისი მართვის პროტოკოლი აქვს და ეს ძალიან კარგად იცის თავად სასჯელაღსრულების სისტემამ. ანუ, რაც შეეხება სტაციონარულ განთავსებას, მოხდება მე-18 დაწესებულებაში, როგორც განაცხადა იუსტიციის სამინისტრომ", — აცხადებს პაპუაშვილი.

მან ისაუბრა კვლევების ჩატარებაზეც და აღნიშნა, რომ სასჯელაღსრულების დაწესებულებას აქვს სრული გამოცდილება, მართოს ასეთი სიტუაციები.

"ამასთან დაკავშირებითაც იყო განცხადებები, მათ შორის, გუშინ ჯანდაცვის მინისტრმაც განაცხადა, რომ ყველა საჭირო დანადგარი არსებობს იქ, მათ შორის არის შესაძლებლობა, რომ მობილური დანადგარები მიიტანონ ადგილზე, თუკი საჭიროა გარკვეული კვლევის ჩატარება და ჩაუტარონ ის კვლევა, რაც საჭიროა. სამედიცინო კუთხით არანაირი რისკი არ არსებობს პაციენტის თუ მსჯავრდებულის მიმართ. სასჯელაღსრულების დაწესებულებას აქვს სრული გამოცდილება, რომ მართოს ასეთი სიტუაციები", — თქვა შალვა პაპუაშვილმა.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 26 დღეა შიმშილობს.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 26 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".