პრემიერმინისტრ ირაკლი ღარიბაშვილის განცხადებით, ექსპრეზიდენტ მიხეილ სააკაშვილს ჭამას არავინ უშლის და აინტერესებს, რატომ შიმშილობს ის. მისივე თქმით, სააკაშვილი არაფრით არ არის განსხვავებული სხვა პატიმრებისგან და არასოდეს არ იქნება პრივილეგირებული.

"ვინ უშლის ჭამას? რატომ შიმშილობს? პატიმარი სააკაშვილი არასოდეს არ იქნება პრივილეგირებული. ერთი მინდა ვუთხრა ყველას, რამდენიმე ათასი პატიმარი ზის საპატიმროებში. მათაც სჭირდებათ მზრუნველობა, ხო? პატიმარი სააკაშვილი არაფრით არ არის განსხვავებული გარდა იმისა, რომ მას ბევრად უფრო მასშტაბური დანაშაულები აქვს ჩადენილი ჩვენი ქვეყნის წინაშე, ვიდრე სხვა დანარჩენ პატიმრებს", — განაცხადა პრემიერმა.

მიხეილ სააკაშვილი პირველ ოქტომბერს დააკავეს. ის დაკავების დღიდან, 23 დღეა შიმშილობს. ჯანდაცვის სამინისტროს ბაზაზე შექმნილმა ექიმთა კონსილიუმმა მისი პროფილაქტიკური ჰოსპიტალიზაციის რეკომენდაცია გასცა. ჯერჯერობით უცნობია, როდის და სად გადაიყვანენ სააკაშვილს დამატებითი გამოკვლევებს ჩასატარებლად.