5 ივლისს პოლიციელის გინების გამო გიორგი თაბაგარი სასამართლომ სამართალდამრღვევად ცნო და სიტყვიერი შენიშვნა მისცა. ბრალდების მხარე მისთვის 15-დღიან ადმინისტრაციულ პატიმრობას ითხოვდა. დაცვის მხარე აღნიშნულს სააპელაციო სასამართლოში გაასაჩივრებს.

პროცესი თბილისის საქალაქო სასამართლოში დღეს გაიმართა. საქმე ეხება 5 ივლისს, იმ დროს, როცა ძალადობრივი ჯგუფი მშვიდობიან მოქალაქეებს ფიზიკურად უსწორდებოდა და თბილისი პრაიდის წარმომადგენლები უსაფრთხო სივრცის პოვნას ცდილობდნენ. გიორგი თაბაგარი ამბობს, რომ ერთი ადგილიდან მეორეზე გადასვლის დროს პოლიციელმა დაურეკა და უკვე დარბეული ოფისის კარის გაღება მოითხოვა, რა დროსაც აგინა.

სასამართლო სხდომაზე მოწმის სახით დღეს დაიკითხა ერთ-ერთი პოლიციელი, გიორგი მელიქიშვილი, რომელიც შემთხვევის დროს გამომძიებელ გიორგი მაჭარაშვილთან ერთად იყო. პოლიციელის განცხადებით, მაჭარაშვილს თაბაგართან საუბრისას ტელეფონი ხმამაღალ რეჟიმზე ჰქონდა ჩართული და დიალოგი მასაც ესმოდა. პროცესზე მას ჰკითხეს, გაემეორებინა სიტყვები, რომლითაც თაბაგარმა პოლიციელს მიმართა. სიტყვების ზუსტად გამეორებისგან მელიქიშვილმა თავი შეიკავა და აღნიშნა, რომ თაბაგარი გამომძიებელს "მამაკაცის სასქესო ორგანოს" ეძახდა.

მისივე თქმით, თაბაგარს თბილისი პრაიდის ოფისში ჩასატარებელი საგამოძიებო მოქმედებებისთვის დაუკავშირდნენ, რადგან ხელმძღვანელი პირისგან ოფისის გაღების თანხმობა სჭირდებოდათ. კითხვას, მოსთხოვეს თუ არა თაბაგარს იმ ტერიტორიაზე მისვლა, რომელიც მანამდე ძალადობრივი ჯგუფის წევრებმა დაარბიეს, პოლიციელი ასე პასუხობს:

"არა, მოთხოვნის ფორმა, არა. ჰკითხა, სად ბრძანდებოდა და როგორ შეეძლებოდა? თვითონ მობრძანდებოდა? ან ვინმე წარმომადგენელი მოსულიყო მისი. ისე ვერ ჩაატარებდა საგამოძიებო მოქმედებას. ყოველ შემთხვევაში, იმ პირობებში".

ბრალდების მხარეს შსს-ს სასამართლოსთან ურთიერთობის სამმართველოს უფროსი, მარიამ კერესელიძე წარმოადგენდა. პროცესზე ის ამბობდა, რომ თაბაგარმა ამ ინფორმაციის Facebook-ზე გამოქვეყნებით "თვის მოწონება სცადა", რაც მისი თქმით, სახდელზე პროპორციულად უნდა ასახულიყო.

"ის არც ინანიებს, არც რაიმე განსაკუთრებული დამოკიდებულება აქვს, რითაც სახდელი, შეიძლება, მსუბუქი სახით იქნეს გამოყენებული. პირიქით, მან Facebook-ის საშუალებით მთელს საზოგადოებას ამცნო, რომ პოლიციელს აგინა და ფაქტობრივად, ამით თავის მოწონებაც კი სცადა. ამიტომ ეს პოსტი ცალსახად ნიშნავს მის დამოკიდებულებას, რაც სახდელზე, ჩვენი აზრით, პროპორციულად უნდა აისახოს", — განაცხადა მან.

თბილისი პრაიდის დამფუძნებელმა, გიორგი თაბაგარმა 4 სექტემბერს გაავრცელა ინფორმაცია, რომ შინაგან საქმეთა სამინისტრომ მის წინააღმდეგ ადმინისტრაციული საქმისწარმოება დაიწყო. როგორც თაბაგარი ჰყვება, 5 ივლისს, თბილისი პრაიდის ოფისის დარბევისა და ქუჩაში ძალადობის შემდეგ, როცა სახელმწიფომ მშვიდობიანი მოქალაქეების ვერ დაიცვა, პოლიციიდან დაურეკეს და უთხრეს, რომ ზარალის აღწერისა და საგამოძიებო მოქმედებებისთვის დარბეული ოფისის კარის გაღება სურდათ. თაბაგარის თქმით, ამ დროს მოძალადეებისგან თავის დაცვის მიზნით უკვე მეოთხე სივრციდან მიდიოდნენ. ის ამბობს, რომ პოლიციელს აგინა და ადმინისტრაციული საქმისწარმოებაც ამის გამო დაიწყო.

აღსანიშნავია, რომ 5 ივლისის ჰომოფობიური და ძალადობრივი აქციის ორგანიზატორები ამ დრომდე არ არიან დასჯილები. ისინი ფიზიკურად გაუსწორდნენ 50-ზე მეტ ჟურნალისტს, დაარბიეს თბილის პრაიდის ოფისი, სცადეს სირცხვილიას ოფისში შეჭრა და თავს დაესხნენ ადამიანის უფლებათა ცენტრს, სადაც, სავარაუდოდ, ხელნაკეთი ასაფეთქებელი მოწყობილობა შეაგდეს, რის შედეგადაც ერთი ადამიანი დაშავდა. 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.