ჯანდაცვის ყოფილი მინისტრისა და ქართული ოცნების დეპუტატის, დავით სერგეენკოს განცხადებით, უკვე კორონავირუსის გავრცელების ტალღების თვლას მნიშვნელობა არ აქვს და ქვეყანაში ეპიდვითარების გაუარესების ტენდენციაა.

"ვართ იქ, რომ ტალღების თვლას, უკვე მესამე არის, მე-4 და მე-5, აღარანაირი მნიშვნელობა არ აქვს. მონაცემები, რაც გვაქვს და იზოლირებულად განვიხილოთ ჩვენი ქვეყანა, არის გაუარესების ტენდენციით, რაც გასაგებია, რაც ნიშნავს: მეტი დაავადებული და სამწუხაროდ, მეტი გარდაცვალება", — განაცხადა მან პალიტრანიუსის ეთერში.

არსებულ მდგომარეობას სერგეენკო ქვეყანაში ვაქცინაციის დაბალ მაჩვენებელს უკავშირებს და აცხადებს, რომ აცრებზე საინფორმაციო კამპანიისას დაფარული არ იყო მოსახლეობის ის სეგმენტი, რომელსაც ვაქცინაციის საჭიროებაზე ინფორმაცია არ ჰქონდა. მისი თქმით, ჯანდაცვის სისტემას აქვს შესაძლებლობა, რომ 10-ჯერ ან 15-ჯერ მეტი ადამიანი აცრას, ვიდრე დღეს ცრის და ეს გადამწყვეტი მნიშვნელობისაა.

"ახლა ჩვენ გვაქვს ასეთი სურათი, რომ საზოგადოების არც თუ ისე მცირე, მე ვიტყოდი, მნიშვნელოვან ნაწილს, აქვს ნეგატიური დამოკიდებულება ვაქცინაციისადმი. ის სეგმენტი, რომელსაც ინფორმაცია არ ჰქონდა იმის შესახებ, რომ ვაქცინაცია საჭიროა, პრაქტიკულად, დაფარული არ იყო იმიტომ, რომ საინფორმაცია კამპანია მიდიოდა იმ სახით, რითიც მიდიოდა: ბილბორდები, განცხადებები, კლიპები ტელევიზიაში და ა.შ", — განაცხადა სერგეენკომ პალიტრანიუსის ეთერში.

მისი თქმით, არსებული მდგომარეობა კომუნიკაციების დარგის მაღალი დონის ექსპერტებმა უნდა შეაფასონ და ჯანდაცვის სისტემას რეკომენდაცია მისცენ.

"ახლა აუცილებელია გაკეთდეს თვისობრივი შეფასება მდგომარეობის, ანუ ამ დარგის მაღალი დონის ექსპერტებმა, ვგულისხმობ, კომუნიკაციის მცოდნე ადამიანებმა, უნდა შეაფასონ, რატომ არის რეზისტენტობა მოსახლეობაში და რჩევა მისცენ ჯანდაცვის სისტემას, რომ სელექტიურად როგორ იმოქმედონ ამაზე", — თქვა მან.

21 ოქტომბრის მონაცემებით, საქართველოში კორონავირუსის 4 411 ახალი შემთხვევა დადასტურდა, გამოჯანმრთელდა — 2 896, ხოლო გარდაიცვალა 29 ადამიანი. ბოლო 24 საათში ქვეყნის მასშტაბით ჩატარდა 53 700 კვლევა ტესტით, მათ შორის, 33 678 კვლევა ანტიგენის ტესტით და 20 022 PCR ტესტით.

NCDC-ის დირექტორი, ამირან გამყრელიძე აცხადებს, რომ მე-5 ტალღა დაწყებულია და წინ ძალიან რთული ნოემბერი გველის. ჯანდაცვის მინისტრის მოადგილე თამარ გაბუნია კი არ გამორიცხავს, რომ აგვისტოს მსგავსად ქვეყანაში კორონავირუსის გავრცელების შემთხვევები გაიზარდოს.

პირველი საუნივერსიტეტო კლინიკის დირექტორის, ლევან რატიანის განცხადებით, თუ კორონავირუსის შემთხვევების რაოდენობა დღევანდელი ტემპით გაიზრდება, ქვეყანაში საწოლფონდის პრობლემა დადგება. ალერგოლოგ-იმუნოლოგი, ბიძინა კულუმბეგოვი კი აცხადებს, რომ ქვეყანას ისევ დაუდგება საველე ჰოსპიტლების გახსნის აუცილებლობა.

საკოორდინაციო საბჭოს წევრები ჯანდაცვის სფეროს ექსპერტები ვაქცინაციის აუცილებლობაზე საუბრობენ.

საქართველოში ამ დროისთვის 4 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.