ყოფილი პრეზიდენტი, მიხეილ სააკაშვილი აცხადებს, რომ საქართველოში დაკავებამდე საქართველოს რამდენიმე რეგიონში იყო. ეს ინფორმაცია მთავარმა არხმა გაავრცელა, რომელმაც სააკაშვილს ციხეში კითხვები გაუგზავნა და მისგან წერილობითი პასუხები მიიღო.

"ვიყავი ბათუმში, ქუთაისში, ფოთში, ლანჩხუთში, სამეგრელოში რამდენიმე ადგილზე, რიკოთზე გეახელით ლობიანს და დაკავებამდე ხინკალი გამოვიძახე და სამწუხაროდ, მხოლოდ ერთი ცალის შეჭმა მოვასწარი", — წერს სააკაშვილი.

ამავე წერილში ის აღნიშნავს, რომ როდესაც საქართველოში ყოფნის დამადასტურებელი პირველი ვიდეო გაასაჯაროვა, უკვე იცოდა, რომ კამერებიდან ჩანაწერებს ამოიღებდნენ და სწრაფად იპოვიდნენ.

"ყველაზე ბევრი კამერა სწორედ იმ ადგილში დგას, სადაც ვიდეოებს ვიღებდი", — აღნიშნავს სააკაშვილი.

კითხვას, რატომ შემოვიდა საქართველოში ფარულად და არა ხმაურით, სააკაშვილმა ასე უპასუხა:

"ამ სცენარში ძალიან ადვილი იქნებოდა გასროლა, აფეთქება, ჟლეტა და მერე ყველაფრის ჩვენზე გადმობრალება".

ის ამბობს, რომ საქართველოში ჩამოსასვლელად დიდი ხანი ემზადებოდა და ამის მცდელობა აქამდეც ჰქონია. სააკაშვილის თქმით, ქვეყანაში დაბრუნების პირველი მცდელობა "კინაღამ ტრაგიკულად დასრულდა".

სააკაშვილი გამოეხმაურა მისი საქართველოში შემოსვლის საქმეზე დაკავებულ სამ ადამიანს და განაცხადა, რომ ისინი უსამართლობის მსხვერპლები არიან. ექსპრეზიდენტი ამბობს, რომ დაკავებულები მალე გარეთ იქნებიან.

მესამე პრეზიდენტის თქმით, მას აქვს "გარკვეული თვითიდენტიფიკაცია" პირველ პრეზიდენტთან. სააკაშვილის თქმით, ყოველთვის ცდილობდა თავი ზვიად გამსახურდიას ადგილას წარმოედგინა და განიცდიდა "მიტოვებულ, დამოუკიდებლობის მომტან პრეზიდენტს". თუმცა, სააკაშვილი აღნიშნავს იმასაც, რომ პირდაპირ პარალელს მისსა და გამსახურდიას საქართველოში დაბრუნებას შორის არ ავლებს.

სააკაშვილის თქმით, საქართველოში მის წინააღმდეგ საქმეების ოდესის გუბერნატორობის დროს, კრემის დაკვეთით აღიძრა. ექსპრეზიდენტის თქმით, იმისათვის რომ მოსკოვმა "ვეტო ვერ დაადოს" მის გათავისუფლებას, ხალხმა უნდა იაქტიუროს.

მიხეილ სააკაშვილი პირველ ოქტომებრს დააკავეს. მანამდე, ექსპრეზიდენტი აქტიურად აცხადებდა, რომ გეგმავდა საქართველოში დაბრუნებას. 27 სექტემბერს მან თვითმფრინავის ბილეთი გაავრცელა გაავრცელა, რომლის მიხედვითაც 2 ოქტომბერს, თვითმმართველობის არჩევნების დღეს უნდა ჩამოფრენილიყო. პირველი ოქტომბრის დილით, სააკაშვილმა ფეისბუქგვერდზე პოსტი გამოაქვეყნა, რომელმაც შექმნა ვარაუდი, რომ შესაძლოა, ის უკვე საქართველოში ყოფილიყო. ამასთან, მან გაავრცელა ორი ვიდეო, სადაც ამბობდა, რომ ბათუმში იყო ფონად კი ქალაქის ხედი ჩანდა.

პირველ ოქტომბერს, მთელი დღის განმავლობაში, ქართული ოცნების წევრები აცხადებდნენ, რომ სააკაშვილს საზღვარი არ გადმოუკვეთავს და მისი ვიდეო არაავთენტური იყო. საზღვრის გადმოკვეთა უარყო შინაგან საქმეთა სამინისტრომაც. დღის ბოლოს, პრემიერმინისტრმა, ირაკლი ღარიბაშვილმა განაცხადა, რომ ექსპრეზიდენტი დაკავებულია და გადაყვანილია პენიტენციურ დაწესებულებაში. მას არ დაუკონკრეტებია სად დააკავეს ის და გადმოკვეთილი ჰქონდა თუ არა საზღვარი.

ექსპრეზიდენტის დაკავებიდან მალევე, ნაციონალური მოძრაობის წევრებმა გაავრცელეს ინფრორმაცია, რომ ის საქართველოში ოთხი დღის განმავლობაში იმყოფებოდა. ქართული ოცნების წევრებმა კი დაიწყეს მტკიცება, რომ ინფორმაცია ყველაფრის შესახებ ჰქონდათ, მაგრამ გამოძიების ინტერესებიდან გამომდინარე სიმართლეს არ ამხელდნენ. ღარიბაშვილმა განაცხადა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება. მან ბოდიშიც კი მოუხადა თანაგუდელებს იმის გამო, რომ სიმართლეს ვერ ამბობდნენ. 4 ოქტომბერს პროკურატამ ინფორმაცია გაავრცელა, რომ სააკაშვილი საქართველოში 29 სეტემბერს შემოვიდა.