კულტურის მინისტრის, თეა წულუკიანის განცხადებით, პატიმრის გადაწყვეტილება შიმშილობის შეწყვეტასთან დაკაშირებით სულ უფრო ფერხდება, როცა ამ ამბის გარშემო დიდი აურზაურია. მისი თქმით, იმის მიუხედავად, რომ წინასაარჩევნო პერიოდისთვის სააკაშვილის შიმშილობაზე საუბარი ვიღაცებს სჭირდებათ, ეს ეწინააღმდეგება პატიმრის უფლებებს, თავისუფლად გადაწყვიტოს, როდის შეწყვიტოს შიმშილი.

"ერთ საიდუმლოსაც გეტყვით, რომ როდესაც პატიმარი შიმშილობს, ჩემი გამოცდილებიდან ვიცი, რაც მეტია შიმშილობის გარშემო აურზაური, მით უფრო ფერხდება პატიმრის მიერ გადაწყვეტილების მიღება, რომ განაახლოს კვება. ეს ყოველი პატიმრის შემთხვევაში ასეა ხოლმე. მესმის, რომ წინასაარჩევნო პერიოდისთვის სჭირდება ვიღაცას, მუდმივად შიმშილობაზე ისაუბროს ტელევიზიით, მაგრამ პატიმარი, რომელიც შიმშილობს, როდესაც მთელი საზოგადოება მის შიმშილზე საუბრობს და ამით ცდილობენ, გვაცხოვრონ, პირდაპირ ეწინააღმდეგება მოცემული პატიმრის უფლებებს, რომ მან თავისუფლად გადაწყვიტოს, როდის შეწყვიტოს შიმშილი, რაც, იმედი მაქვს, მალე დადგება", — აცხადებს წულუკიანი.

მინისტრმა ასევე აღნიშნა, რომ ექსპრეზიდენტის ჯანმრთელობის მდგომარეობის გაუარესების რისკი არ არსებობს და "მითუმეტეს არ არსებობს, ღმერთმა დაგვიფაროს, მისი გარდაცვალების რისკი".

ამ თემაზე წულუკიანმა მას შემდეგ ისაუბრა, რაც სახალხო დამცველმა თქვა, რომ პენიტენციური სამსახურისა თუ მაღალი პოლიტიკური თანამდებობის პირების მხრიდან ექსპრეზიდენტზე გაკეთებული განცხადებებით იქმნება დამატებითი საფრთხე, რომ მოშიმშილე სააკაშვილმა უარი თქვას სამედიცინო მომსახურების მიღებაზეც. ომბუდსმენი უარყოფითად აფასებს ნებისმიერი სახის განცხადებას, რომელიც "უბიძგებს პატიმარს უფრო მძიმე შიმშილობის ფორმაზე გადასვლას და კიდევ უფრო ამძიმებს ბრალდებულის/მსჯავრდებულის ჯანმრთელობის მდგომარეობას".

ამასთანავე, იუსტიციის სამინისტრომ ჯანდაცვის უწყებას მიმართა, მიხეილ სააკაშვილის მდგომარეობის შესწავლისა და დეტალური ანალიზის მიზნით ექიმების მულტიფუნქციური ჯგუფი გამოყოს. მათი განმარტებით, მედიკოსების ჯგუფის მიზანი იქნება ექსპრეზიდენტის ჯანმრთელობის მდგომარეობის პერიოდული დაკვირვება და საჭიროების შემთხვევაში შესაბამისი რეკომენდაციების წარდგენა.

მიხეილ სააკაშვილი 13 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე:

• "ჩემს წინასწარ გლოვას სჯობს, ხელები დავიკაპიწოთ და 30-ში ერთად ვიზეიმოთ გამარჯვება" — სააკაშვილის წერილი
• როცა ადამიანი ამბობს, რომ შიმშილობს, ნახევარ კილოგრამ თაფლს არ უნდა ჭამდეს — ღარიბაშვილი