ქართული ოცნების საზოგადოებასთან ურთიერთობის მდივნის, შალვა პაპუაშვილის განცხადებით, ადამიანები, რომლებიც გამოდიან მოწოდებით "თავისუფლება მიშას", დასცინიან ექსპრეზიდენტ მიხეილ სააკაშვილის "დანაშაულებების მსხვერპლებს". მან მოუწოდა ყველას, დაფიქრდნენ, როცა მსგავსი მოწოდებით გამოდიან. მათ შორის, ევროპარლამენტარებს. ამავდროულად, მან აღნიშნა, რომ სააკაშვილის საკითხი ტესტია იმის დასადგენად, ვინ არის ქვეყნის მეგობარი.

"დღეს ყველა ვინც საუბრობს და ვინც ამბობს, "თავისუფლება მიშას", სწორედ ის ხალხი დღეს დასცინის მიხეილ სააკაშვილის დანაშაულების მსხვერპლებს. [...] ამიტომ ყველას მოვუწოდებ, ვინც დღეს ამბობს "თავისუფლება მიშას", დაფიქრდეს რას საუბრობენ ისინი", — თქვა მთავარ არხთან პაპუაშვილმა.

ჟურნალისტის კითხვას, გულისხმობს თუ არა მათ შორის ევროპარლამენტარებს, პაპუაშვილმა ასე უპასუხა:

"თავისთავად, რა თქმა უნდა. ვფიქრობ, რომ სააკაშვილის საკითხი გახდა კარგი ტესტი იმისთვის, რომ დავადგინოთ, ვინ არის საქართველოს მეგობარი და ვინ არის მიხეილ სააკაშვილის მეგობარი".

მიხეილ სააკაშვილი პირველ ოქტომბერს, არჩევნებამდე ერთი დღით ადრე დააკავეს. მას შემდეგ, ამ თემაზე ევროპარლამენტარებმა არაერთი კომენტარი გააკეთეს. მათ შორის, იყო ანდრიუს კუბილიუსი, რომელმაც თქვა, რომ ყოფილი პრეზიდენტის ციხეში ჩასმა კარგი არ არის და ეს არ ხდება ევროპულ ქვეყნებში.

7 ოქტომბერს ერთობლივი განცხადება გაავრცელეს ევროპარლამენტარებმა, რასა იუკნევიჩიენემ და კუბილიუსმა. წერილში მათ შეშფოთება გამოთქვეს, ღარიბაშვილის საჯარო მუქარაზე, სააკაშვილისთვის ბრალდების დამატებასთან დაკავშირებით.

ევროპარლამენტარის, პეტრას აუსტრევიჩუსის 4 ოქტომბრის განცხადებით კი, ექსპრეზიდენტის, მიხეილ სააკაშვილის დაკავება საქართველოში პოლიტიკურ პოლარიზაციას კიდევ უფრო ზრდის.