ბათუმში, საცხოვრებელი კორპუსის ნანგრევებიდან ამოყვანილი ქალის ქმარი, რამაზ დავლაძე ამბობს, რომ მისი ცოლი შეუძლოდაა და ჯერჯერობით კონტაქტური არ არის. რამაზ დავლაძე ახლა ნანგრევებიდან შვილების ამოყვანის მოლოდინშია.

"ძაან შეუძლოდაა, დამტვრეულია. ძაან შეუძლოდაა. ღმერთის წყალობით ცოცხალია. ახლა ბავშვებსაც გამოვიყვანთ, ღმერთით [...] თითქოს ბავშვების ხმაც ისმისო, მაგრამ არ ვიცი, არ მინახავს და არ გამიგია არაფერი", — ამბობს დავლაძე.

დაახლოებით ერთი საათის წინ კორპუსის ნანგრევებიდან ახალგაზრდა ქალი ამოიყვანეს. როგორც ბათუმის რეფერალურ საავადმყოფოში On.ge-ს უთხრეს, მისი მდგომარეობა უკიდურესად მძიმეა.

დღეს, 8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. შინაგან საქმეთა მინისტრის, ვახტანგ გომელაურის ინფორმაციით, ნანგრევებში დაახლოებით 10-15 ადამიანი უნდა იყოს, რომელთაგან კონტაქტზე 2 გამოდიოდა.

მსხვერპლის შესახებ ინფორმაცია, ჯერჯერობით, არ ვრცელდება. ამ დროდმე უცნობია ნგრევის მიზეზიც. ვახტანგ გომელაურმა განაცხადა, რომ მიზეზი, შესაძლოა, ნგრევა ყოფილიყო.

რამდენიმე საათის წინ, კლინიკიდან გაწერეს ბავშვი, რომელიც კორპუსის ნგრევისას მის წინ მდებარე მანქანაში იყო და ნანგრევებს შორის მოყვა. ბათუმის იაშვილის კლინიკის მთავარი ექიმის, თამარ ბახტაძის ინფორმაციით, წვივის ძვლის მოტეხილობა და ზედაპირული დაზიანებები აქვს.