ბათუმის მერის მოვალეობის შემსრულებელი, ლელა სურმანიძე აცხადებს, რომ ამ ეტაპზე ჩამონგრეული კორპუსის მძიმე ტექნიკით გაწმენდა შეუძლებელია, რადგან, თუ მის ქვეშ ადამიანია მოყოლილი, მძიმე ტექნიკა მას დააზიანებს. ის აღნიშნავს იმასაც, რომ კორპუსში ბუნებრივი აირი და ელექტროენერგია გათიშულია.

"ტექნიკა აქ არის პირველივე წუთიდან. რას მეუბნებით, რას ნიშნავს 15 წუთის წინ? 1 საათის წინ 3 მანქანა იდგა სახანძრო-სამაშველო. მძიმე ტექნიკით ამ ნანგრევების გაწმენდა არანაირად არ შეიძლება იმიტომ, რომ შეიძლება იყოს მოყოლილი ადამიანი და ეს მძიმე ტექნიკა დააზიანებს", — განაცხადა მან.

ბათუმში, 26 მაისის ქუჩაზე კორპუსი ჩამოინგრა. ჯერჯერობით უცნობია, არიან თუ არა დაღუპულები. ნანგრევებიდან გამოყვანილია მცირეწლოვანი ბავშვი.

ბათუმის მერის მოვალეობის შემსრულებელი, ლელა სურმანიძე აცხადებს, რომ კორპუსი ავარიული არ ყოფილა. მისი თქმით, ჩამონგრევის მიზეზი ჯერჯერობით უცნობია. სურმანიძე აღნიშნავს იმასაც, რომ 5-6 წლის განმავლობაში ამ კორპუსში ახალი მიშენება არ განხორციელებულა.

On.ge დამატებითი ინფორმაციის მიღებას საგანგებო სიტუაციების მართვის სამსახურისა და შინაგან საქმეთა სამინისტროსგან ცდილობს. დეტალებს უწყებებიდან პასუხის მიღებისთანავე შემოგთავაზებთ.

გაიგეთ მეტი: