ნაციონალური მოძრაობის ერთ-ერთი ლიდერის, თინა ბოკუჩავას განცხადებით, მეორე ტურებში ოპოზიციის გამარჯვება იქნება გადამწყვეტი, რადგან ეს რიგგარეშე საპარლამენტო არჩევნების ჩანიშვნის საფუძველი გახდება.

"როდესაც მმართველ გუნდს არ გააჩნია ლეგიტიმაცია ქვეყნის მთავარ, ყველაზე დიდ ქალაქებში, ეს ბუნებრივია, კითხვის ნიშნის ქვეშ აყენებს მთლიანად მმართველი პარტიის ლეგიტიმაციას, განსაკუთრებით მაშინ, როდესაც მათ პრეტენზია აქვთ ერთპარტიულ მმართველობაზე. ამიტომ გადამწყვეტია მეორე ტურებში გამარჯვება, იმიტომ, რომ ყველა თვითმმართველ ქალაქში შედგება მეორე ტური და რა თქმა უნდა, ოპოზიციის ეს გამარჯვება ავტომატურად გახდება ვადამდელი საპარლამენტო არჩევნების ჩანიშვნის საფუძველი და ხელისუფლების ცვლილების საფუძველი", — განაცხადა მან.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.