მიხეილ სააკაშვილის ადვოკატის, ბექა ბასილაიას თქმით, არ გაუკვირდება, რომ ადვოკატებისა და ექსპრეზიდენტის შეხვედრის ჩანაწერები გაავრცელონ, რადგან ოთახში, სადაც მას ხვდებიან, 2 კამერაა დამონტაჟებული.

"ის, რომ ციხეშიც გვისმენენ და ყველგან გვისმენენ, ამაზე ორი აზრი არ არსებობს. საერთოდ შეხვედრების ოთახში, სადაც მიხეილ სააკაშვილს ვხვდებით, 4 "შტეფცელია", IT ოთახი ხომ არაა, ადვოკატი ხვდება მსჯავრდებულს, რა უნდა 4 "შტეფცელს" იმ ოთახში, გარდა იმისა, რომ 2 კამერაა, მაგრამ ამას თავი დავანებოთ, რაზეც ისაუბრა ღარიბაშვილმა, ეს არის ჭორიკნობა და ისიც არ გამიკვირდება, ხვალ ჭორბიუროს მთავარმა სპიკერმა ჩვენი და მიშა სააკაშვილის შეხვედრებს ტიტრები დაადოს და ესეც გაავრცელოს. უკვე ესენი ფსკერს მიღმა არიან", — ამბობს ბასილაია.

მისი თქმით, ხელისუფლებას ეშინია სააკაშვილის სასამართლო დარბაზში გამოჩენის და სწორედ ამიტომ არ ნიშნავს სასამართლო პროცესს.

"რეალური ვითარება არის ის, ბიძინა ივანიშვილს პანიკური შიში აქვს მიშა სააკაშვილის და ყველანაირად ცდილობს ციხეში მყოფი, იზოლაციაში მყოფი, მიხეილ სააკაშვილი შეზღუდოს, რომ საზოგადოებასთან პირდაპირი კომუნიკაციის შესაძლებლობა არ ჰქონდეს. თუ მაგარი ბიჭები არიან, ჩანიშნონ სასამართლო პროცესები. უფრო მეტიც, თუ მაგარი ბიჭები არიან, წაუყენონ საზღვრის კვეთაზე ბრალდება, რატომ არ უყენებენ? იმ საწყალ ხალხს რომ უყენებენ ბრალდებებს, როგორც ზვიად გამსახურდიას მომხრეებს დასდევდა ხუნტა, ისე რომ დასდევენ წოწორიებს, ცომაიებს და სხვებს. წაუყენონ მიშას საზღვრის კვეთაზე ბრალდება, რატომ არ უყენებენ? იმიტომ არ უყენებენ, რომ სასამართლო პროცესის ჩანიშვნა მოუწევთ და ეშინიათ სააკაშვილის სასამართლო დარბაზში გამოჩენის. ესაა სიმართლე, სიმართლე არის ის, რომ ხელისუფლებაა მხდალი", — ამბობს ადვოკატი.

მისივე განცხადებით, ექსპრეზიდენტისთვის ზარების შეზღუდვის არანაირი საფუძველი არ არსებობდა, თუმცა არ გაუკვირდება, რომ ადვოკატებსაც შეუზღუდონ მისი მონახულება, რათა მისი მესიჯები არ გააჟღერონ.

მიხეილ სააკაშვილის ადვოკატმა, ბექა ბასილაიამ 5 ოქტომბერს განაცხადა, რომ პენიტენციურმა დაწესებულებამ პროკურატურისგან მიიღო მოთხოვნა, რომ ექსპრეზიდენტს არ მიეცეს ზარის განხორციელების უფლება.