პარლამენტის პლენარულ სხდომაზე დღეს, ფარული საგამოძიებო მოქმედებების შესახებ პრეზიდენტის მოტივირებულ შენიშვნებს განიხილავენ, სადაც უმრავლესობის წევრმა ეკა ბესელიამ განაცხადა, რომ პრეზიდენტი უხეშად ერევა საპარლამენტო საქმიანობაში.

მისი თქმით, პრეზიდენტის კონსტიტუციური უფლებამოსილება არ არის, ის თუ რა ჩაიწერება კანონში:

"რამდენად სწორია, რომ პრეზიდენტი გვკარნახობს რა ჩავწეროთ კანონში? არის თუ არა პრეზიდენტის კონსტიტუციური უფლებამოსილება ეს? ჩვენ ვართ კანონმდებლები და სააგენტოს რა დაერქმევა, ვისთან უნდა იყოს იგი, ამას ჩვენ ვწერთ და არა პრეზიდენტი. შენიშვნები არის სხვა, მაგრამ ვისთან უნდა იყოს სააგენტო ეს მიმაჩნია საპარლამენტო საქმიანობაში ძალიან უხეშ ჩარევად".

1 მარტს მესამე მოსმენით, 87 ხმით 2-ის წინააღმდეგ მიიღო კანონი. ცვლილებების მიხედვით, სახელმწიფო უსაფრთხოების სამსახურის მმართველობის სფეროში შეიქმნება საჯარო სამართლის იურიდიული პირი - საქართვლოს ოპერატიულ-ტექნიკური სააგენტო.

პრეზიდენტი გამოყოფს ორ ფუნდამენტურ პრობლემას აღნიშნულ კანონში და ესენია:

  • პირველი, ეს არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი და შესაბამისად, ეწინააღმდეგება ამ საკითხზე საკონსტიტუციო სასამართლოს გადაწყვეტილებას.
  • მეორე ეს არის კანონპროექტში გაუმართლებელი და არაპროგნოზირებადი ხარჯები, რომელსაც ეს კანონპროექტი აკისრებს საკომუნიკაციო კომპანიებს.