ეგზიტპოლის შედეგების გამოცხადების შემდეგ, ქართული ოცნება არჩევნებში გამარჯვებას ზეიმობს. ღარიბაშვილის თქმით, მერვედ გამარჯვება მათთვის დიიდ პატივია. მან ადგილობრივი თვითმმართველობის არჩევნებში გამარჯვება თბილისის მერობის კანდიდატ კახა კალაძესაც მიულოცა.

"დიდი პატივია ჩვენთვის დღეს მერვედ გამარჯვება. კიდევ ერთხელ გილოცავთ და ვულოცავ ქართული ოცნების თითოეულ წევრს ამ დიდებულ გამარჯვებას. ვულოცავ კახა კალაძეს, ვულოცავ ყველა მერს ღირსეულ გამარჯვებას, ჩვენს პარტიას ვულოცავ, ქვეყანასა და ხალხს. დღევანდელი გამარჯვება გეკუთვნით თქვენ, სრულიად საქართველოს და ჩვენს მოსახლეობას. მინდა კიდევ ერთხელ მადლობა გადავუხადო თითოეულ ჩვენს ამომრჩეველს, მხარდამჭერს. ასევე, მინდა მივმართო ჩვენს ოპონენტებს, რომ დღეს დავასრულეთ პოლარიზაცია ქვეყანაში. დღეს დავასრულეთ სიძულვილისა და სიცრუის ეპოქა, ხვალიდან უნდა დაიწყოს სიმშვიდის, განვითარების, სტაბილურობის ხანა", — აცხადებს ღარიბაშვილი.

რამდენიმე წუთის წინ სამი სხვადასახვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. მაგალითად: ერთი გვეუბნება, რომ კალაძე პირველივე ტურში იგებს, დანარჩენი 2 მეორე ტურს გვპირდება, მაგრამ ხმების რაოდენობით ლიდერად ერთში კალაძე და ერთში კი მელია ლიდერობს.

GORBI

არჩევნების მეორე ტური მხოლოდ იმედის დაკვეთით ჩატარებული ეგზიტპოლის მიხედვით, არ გაიმართება. აქ შედეგებით, კალაძე ლიდერობს და უშუალო კონკურენტს, ნიკა მელიას 16 პროცენტით უსწრებს.

კახა კალაძე — 51,3%;
ნიკა მელია — 34,6;
გიორგი გახარია — 5,6;
ანა დოლიძე — 3,1%;
ანა ბიბილაშვილი — 2,0%.

IPSOS

მთავარი არხის დაკვეთით ჩატარებული ეგზიტპოლი აჩვენებს, რომ თბილისში მეორე ტური გაიმართება, თუმცა აღსანიშნია, რომ აქ მელია ლიდერობს და არა კალაძე. ამ შემთხვევაში კონკურენტებს შორის მინიმალური სხვაობა 0,6% არის.

ნიკა მელია — 40,8%;
კახა კალაძე — 40,2%;
გიორგი გახარია — 8,7%;
ანა დოლიძე — 3,5%;
ანა ბიბილაშვილი — 2,6%.

EDISON RESEARCH

ფორმულას დაკვეთით ჩატარებული ეგზიტპოლის შედეგებიც მეორე ტურის მოლოდინს ქმნის, თუმცა აქ შედეგებით არა მელია, არამედ კალაძე ლიდერობს და კონკურენტს 4%-ით უსწრებს.

კახა კალაძე — 43%;
ნიკა მელია — 39%;
გიორგი გახარია — 7%;
ანა დოლიძე — 4%;
ანა ბიბილაშვილი — 2%;
გიორგი ლომია — 1%
რიჩარდ ოგბუნუჯუ — 1%