"დღეს თავისუფლად შეგვიძლია ვთქვათ, რომ ქართულმა ოცნებამ პირწმინდად წააგო დედაქალაქი", — ამბობს ნაციონალური მოძრაობის ლიდერი, ნიკა მელია ეგზიტპოლის შედეგების გამოცხადების შემდეგ.

"პოლიტიკური ცენტრი, დედაქალაქი თბილისი წააგო და საკრებულო იქნება, უკვე შეგვიძლია ვთქვათ, ოპოზიციური პარტიების მიერ დაკომპლექტებული. უმრავლესობა არის ოპოზიციური პარტიების მიერ დასაკომპლექტებელი და დაინახეთ, ვნახეთ და ვიხილეთ შედეგები მერის არჩევნების ნაწილში. აქ, რა თქმა უნდა, გაიმართება მეორე ტური, სადაც აუცილებლად ერთიანი ოპოზიციური ფრონტით კოალიციურ მმართველობაში იქნება, როგორც საკრებულო, ასევე, აღმასრულებელი ხელისუფლება თვითმმართველობის დონეზე თბილისის მუნიციპალიტეტში", — განაცხადა მან.

რამდენიმე წუთის წინ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს.