პრემიერმინისტრის, ირაკლი ღარიბაშვილის მტკიცებით, შესაბამის უწყებებს ექსპრეზიდენტ მიხეილ სააკაშვილის მარშრუტის შესახებ ინფორმაცია წინასწარ ჰქონდათ. მისივე თქმით, იცოდნენ სააკაშვილის გადაადგილება უკრაინიდან საქართველომდე და დასაკავებლად ისეთ ადგილი შეარჩიეს, სადაც ნაკლები ხელშემშლელი ფაქტორი იყო.

აღსანიშნავია ისიც, რომ დღეს მთელი დღის განმავლობაში ქართული ოცნების ლიდერები ამტკიცებდნენ, რომ სააკაშვილი საქართველოში არ არის, ახლა კი პრემიერი ამბობს, რომ სააკაშვილის მარშრუტზე წინასწარ იცოდნენ.

"საქართველოს მესამე პრეზიდენტი, ძებნილი მიხეილ სააკაშვილი დაკავებულია და გადაყვანილი არის პენიტენციურ დაწესებულებაში. ჩვენმა სამართალდამცავებმა უმაღლეს დონეზე დააკავეს ძებნილი მიხეილ სააკაშვილის დაკავების ღონისძიება.

სამართალდამცავ უწყებებს ჰქონდათ წინასწარ ინფორმაცია მისი გადაადგილების შესახებ დაწყებული უკრაინიდან საქართველოს მიმართულებით და ეს პროცესი იყო სრული კონტროლის ქვეშ. მიმდინარეობდა შესაბამისი ღონისძიებები, უწყებები კოორდინირებულად მუშაობდნენ და შეირჩა ისეთი დრო და ადგილი, რომ დაკავებისთვის მინიმალური ხელისშემშლელი დრო და ფაქტორი ყოფილიყო", — განაცხადა ღარიბაშვილმა.

ექსპრეზიდენტის დაკავებაზე ინფორმაცია სწორედ პრემიერმინისტრმა გაავრცელა. ბრიფინგზე მას თან ახლდნენ შინაგან საქმეთა მინისტრი და სახელმწიფო უსაფრთხოების სამსახურის უფროსი, თუმცა მათ არც განცხადება გაუკეთებიათ და არც კითხვებზე უპასუხიათ.

პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა რომელმაც შექმნა ვარაუდი, რომ შესაძლოა, ის საქართველოში იყო. ამასთან, მან გაავრცელა ორი ვიდეოც, სადაც ამბობდა, რომ ბათუმშია.

შინაგან საქმეთა სამინისტროში ამბობდნენ, რომ ექსპრეზიდენტს ქვეყნის საზღვარი არ გადმოუკვეთავს. ქართული ოცნების თავმჯდომარე ირაკლი კობახიძე კი ამტკიცებდა, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობდნენ, რომ ის ნამდვილად ჩამოვიდა,

აღსანიშნია ისიც, რომ 27 სექტემბერს სააკაშვილმა სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.