საქართველოს ჟურნალისტური ეთიკის ქარტიის განცხადებით, თბილისის მერის, კახა კალაძის კომენტარები ჟურნალისტების მიმართ, დემოკრატიისთვის საფრთხის შემცველია და დამახასიათებელია ავტორიტარიზმისთვის. კალაძემ ჟურნალისტების მისამართით გამოიყენა ისეთი ტერმინები, როგორებიცაა: "რადიკალები", "უბინძურესი ადამიანები" და "სიძულვილისა და ბოროტების თავი და თავი".

"ჟურნალისტური ეთიკის ქარტია გმობს კახა კალაძის განცხადებას და მიიჩნევს, რომ მედიის მიმართ ასეთი დამოკიდებულება დამახასიათებელია ავტორიტარიზმისთვის. ქარტიას მიაჩნია, რომ აღნიშნული მედიის მიმართ სიძულვილის წახალისებაა, რაც განსაკუთრებით სახიფათოა არჩევნების პერიოდში.

აღსანიშნავია, რომ კახა კალაძე ადრეც გამოირჩეოდა აგრესიული რიტორიკით ჟურნალისტების მიმართ, როდესაც მან 2021 წლის 20 ივლისს მედიის საქმიანობა ძალადობრივი ჯგუფების ქმედებებს შეადარა", — წერია ქარტიის განცხადებაში.

განცხადებაში ასევე საუბარია, რომ პოლიტიკოსების აგრესიული რიტორიკა ქმნის პოლარიზებულ მედიაგარემოს, ამასთან ჟურნალისტების უსაფრთხოებას უქმნის საფრთხეს.

ჟურნალისტური ეთიკის ქარტია მოუწოდებს ხელისუფლების წარმომადგენლებს, საკუთარი აგრესიული დამოკიდებულებით არ წაახალისონ მედიის წარმომადგენლებზე თავდასხმა და მხარი დაუჭირონ მედიის თავისუფლებას.

დღეს, 29 სექტემბერს თბილისის მერმა, კახა კალაძემ, შეურაცხმყოფელი ტერმინოლოგიით მოიხსენია მთავარი არხის ჟურნალისტები და კითხვის პასუხად ტელეკომპანიის წარმომადგენელს უთხრა, რომ მათზე უფრო "დიდი რადიკალები" და "უბინძურესი ადამიანები" ქვეყანაში არ არსებობენ. ამ ფორმით კალაძე გამოეხმაურა ჟურნალისტის რეპლიკას მედიის დევნის, 5 ივლისისა და ევროკავშირის ოფისის წინ ქართული ოცნების აქტივისტების მობილიზების შესახებ.

ეს პირველი შემთხვევა არ არის, როდესაც კახა კალაძე, ისევე, როგორც ქართული ოცნების ლიდერები ოპოზიციურ და კრიტიკულ მედიას თავს ესხმიან, კითხვებს არ პასუხობენ ან მათ მიმართ აგრესიულად არიან განწყობილნი. დიდი ხნის განმავლობაში ისინი საერთოდ უარს ამბობდნენ მათთან კომუნიკაციაზე, ეთერებში მისვლასა და ინდივიდუალური კომენტარების ჩაწერაზე.

მმართველი გუნდი მსგავსი დამოკიდებულების გამო არაერთხელ გააკრიტიკა მედიის საკითხებზე მომუშავე არასამთავრობო ორგანიზაციებმა. ისინი აღნიშნავდნენ, რომ ეს აძლიერებს პოლარიზაციას და ჟურნალისტებს საფრთხეს უქმნის, რადგანაც ახალისებს ძალადობრივ ჯგუფებს.

ამავე თემაზე: