თბილისის მოქმედი მერისა და მერობის კანდიდატის, კახა კალაძის თქმით, "არ ესიამოვნებოდა, რომ 2 ოქტომბერს არჩევნებში წაგების შემდეგ ნაციონალური მოძრაობის ლიდერი ნიკა მელია გაიქცეს. საზოგადოებრივი მაუწყებლის ეთერში მელიას მიერ თბილისის მერობის კანდიდატებს შორის დებატების დატოვებაზე საუბრისას კალაძემ აღნიშნა, რომ მსგავსი დესტრუქცია ენმ-ს ხელწერაა.

"გულდასაწყვეტია, როცა ამ პარტიის ლიდერი გაიქცა, თუმცა უნდა აღინიშნოს რომ ასეთი დესტრუქცია და არეულობა არის მათი პარტიის ხელწერა. ისინი ყოველთვის ცდილობენ ყოველდღიურად რომ გარკვეული დაძაბულობა შემოიტანონ, რასაც ჩვენ არავითარ შემთხვევაში არ დავუშვებთ და ნამდვილად არ მესიამოვნებოდა ის, რომ 2 ოქტომბერს, როცა ნიკა მელია არჩევნებს წააგებს, გაიქცეს. პირიქით, ჩვენ უნდა დავასრულოთ პოლარიზება და ყველა განსხვავებული პოლიტიკური შეხედულების მქონე ადამიანს უნდა ეცხოვრებოდეს ამ ქვეყანაში ყოველგვარი პრობლემების გარეშე", — თქვა კალაძემ საზოგადოებრივ მაუწყებელში დებატისას.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.