პრემიერმინისტრის, ირაკლი ღარიბაშვილის თქმით, თუ მიხეილ სააკაშვილი საქართველოში ჩამოვა, არავის შეეკითხებიან კანონი უნდა აღსრულდეს თუ არა. აღნიშნულით ღარიბაშვილმა უპასუხა კითხვას იმის შესახებ არის თუ არა მზად ექსპრეზიდენტის ჩამოსვლისა და მისი დაკავების შემთხვევაში საერთაშორისო პარტნიორების რეაქციისთვის.

"ჩვენ არავის არ შევეკითხებით, პირდაპირ ვაცხადებ, კანონი უნდა აღსრულდეს, თუ არ უნდა აღსრულდეს ამ მოძალადე ადამიანის მიმართ, ვინც წლების განმავლობაში ჩაგრავდა ჩვენს მოსახლეობას, ვინც 20% ჩვენი ტერიტორიების დააკარგვინა, გადასცა კოდორი, 100-ზე მეტი სოფელი რუსეთს და რუსული ჯარი შემოიყვანა საქართველოში", — განაცხადა მან რუსთავი 2-ის ეთერში.

მისივე თქმით, აქვს ინფორმაცია, რომ უცხოელი მეგობრები ექსპრეზიდენტს დაჟინებით სთხოვენ, რომ თბილისში არ ჩამოვიდეს.

"რა თქმა უნდა, ჩვენ ჩვენს კოლეგებს, ჩვენს მეგობრებს ავუხსნით და მათ იციან ძალიან კარგად ვინც არის, მათ შორის, მე გეტყვით — მე ინფორმაცია მაქვს, რომ ჩვენი უცხოელი მეგობრების დაჟინებული თხოვნა, მუქარა მის მიმართ არის, რომ არ ჩამოვიდეს თბილისში, თუმცა მე კიდევ ვუბრუნდები, ეს, რა თქმა უნდა, მორიგი შოუ აქვს მოფიქრებული, რომ აქ თავის გუნდს აჩვენოს, რომ მას უნდა ჩამოსვლა, მაგრამ ვინაიდან, ესენი არ სთხოვენ ჩამოსვლას, მაშინ არ ჩამოვა", — ამბობს პრემიერმინისტრი.

მიხეილ სააკაშვილმა 6 სექტემბერს კიდევ ერთხელ განაცხადა, რომ საქართველოში ჩამოვა, თუმცა თარიღს ისევ არ აკონკრეტებს. მისი თქმით, თარიღსა და მარშრუტთან დაკავშირებით მოსახლეობას საქმის კურსში მაშინ ჩააყენებს, როცა ყველაფერი ხელთ ექნება.

ეს პირველი შემთხვევა არ არის, როდესაც სააკაშვილი საქართველოში დაბრუნებაზე საუბრობს. იმავეს ამბობდა ის წინა არჩევნების პერიოდშიც და ეს რამდენჯერმე დააანონსა 2 ოქტომრბის თვითმმართველობის არჩევნებამდე. მას ზუსტი თარიღი არც აქამდე უთქვამს, თუმცა აცხადებდა, რომ პირობას შეასრულებდა და "რეფერენდუმის" წინ საქართველოში ჩამოვიდოდა.

გაიგე მეტი: