საქართველოს პრეზიდენტმა გიორგი მარგველაშვილმა ბაქოს მეხუთე გლობალურ ფორუმზე 50-ზე მეტი ქვეყნის მოქმედ და ყოფილ ლიდერს სიტყვით მიმართა.

პრეზიდენტმა რუსეთის მიერ საქართველოს ტერიტორიების ოკუპაციაზე გაამახვილა ყურადღება და განაცხადა, რომ რუსეთის საგარეო პოლიტიკა მიუთითებს საერთაშორისო ურთიერთობების და საერთაშორისო გლობალური წესრიგის დარღვეულობაზე:

"გუშინ, რუსეთის მთავრობის გადაწყვეტილებით, ცხინვალის ოკუპირებულ რეგიონში განწესდა ე.წ. არმია, რომელიც რუსულ სამხედრო კონტროლს ექვემდებარება. ეს არის ის მაგალითი, რომელიც გვაჩვენებს, რომ ოკუპირებულ ტერიტორიებთან თანამშრომლობის პრეცენდენტის შექმნით, რუსეთი საერთაშორისო ურთიერთობების დაცინვას ცდილობს".

მარგველაშვილის აზრით, სტაბილურიბა გულწრფელ რეაქციასა და კრიტიკაზეა დამოკიდებული:

"უნდა ვიყოთ საერთაშორისო ურთიერთობების და საერთაშორისო სამართალის სწორედ ეს უნდა იყოს ჩვენი თანამშრომლობის საფუძველი. საქართველო ოკუპირებულია მეზობელი, ძალიან ძლიერი, ბირთვული სახელმწიფოს, რუსეთის მიერ. რუსულმა არმიამ ოკუპაცია 2008 წელს დაიწყო, თუმცა საქართველო მანამდეც, 1990-იანი წლების დასაწყისში, დამოუკიდებლობის გამოცხადებისასაც იყო ჰიბრიდული ომის მსხვერპლი.

ფაქტია, რომ საქართველო, რომელიც ხელს უწყობს გლობალურ უსაფრთხოებასა და სტაბილურობას, დაზარალებულია მეზობელი ქვეყნის მიერ. ეს ის ფაქტია, რომელსაც ყველამ უნდა გაუსწოროს თვალი და ჩვენ უნდა გვესმოდეს, რომ ამ ფაქტის აღიარება მიგვიყვანს უფრო ნათელ გადაწყვეტილებებსა თუ ხედვებამდე".

გიორგი მარგველაშვილის თქმით, საქართველო ოკუპირებულია იმ რწმენის შედეგად, რომ რუსეთს გააჩნია მეზობელ ქვეყნებზე ძალადობის უფლება.

"მე არ მიმაჩნია, რომ 2008 წელს საქართველოს ოკუპაციის და შემდეგ უკრაინაში ყირიმის კონფლიქტის პერიოდში თითოეული ჩვენთაგანის რეაქცია სათანადოდ მკვეთრი იყო. შესაბამისად, ჩვენ ძალიან მკაფიოდ უნდა ვუპასუხოთ გლობალიზებული მსოფლიოს ნებისმიერ კუთხეში არსებულ ტერორიზმის, ჰიბრიდული ომის და არათანაბარი ძალაუფლების გამოწვევებს".