ოპოზიციური პარტიების ნაწილი ევროპული საბჭოს პრეზიდენტს, შარლ მიშელს, ევროპული კომისიის პრეზიდენტს, ურსულა ფონ დერ ლეინს, ევროპული პარლამენტის პრეზიდენტს, დავიდ მარია სასოლისა და ნატოს გენერალურ მდივანს, იენს სტოლტენბერგს წერილით მიმართავს და აცხადებს, რომ მათთვის განგაშისა და იმედგაცრუების მიზეზია საქართველოს მთავრობის მიერ ევროკავშირისთვის უარის თქმა იმ მაკროფინანსურ დახმარებაზე, რომელიც ქვეყანაში სასამართლოს რეფორმის იმპლემენტაციას უნდა მოხმარებოდა.

"ვთვლით, რომ მომხდარი საქართველოს მომავლისთვის უდიდეს პრობლემას წარმოადგენს. ეს სრულიად წინააღმდეგობრივი ნაბიჯი ჩვენი ქვეყნის ისტორიაში უპრეცედენტოა და ერთ-ერთია იმ მოვლენათა კასკადიდან, რომელიც ქართველი ხალხის ისტორიული ნება-სურვილის საწინააღმდეგოდ, ევროატლანტიკური სვლისთვის ხელის შეშლას ისახავს მიზნად", — აცხადებენ პარტიები.

მათივე განცხადებით, იმით, რომ თავდაპირველი ვალდებულებების შემდეგ ქართულმა ოცნებამ უხეშად დაარღვია 19 აპრილის შეთანხმების პირობები და საერთოდ დატოვა მოლაპარაკებების ფორმატი, ხოლო ახლა დაფინანსებაზე უარი თქვა, კიდევ უფრო აუარესებს სახიფათო ტრაექტორიას.

"მიუხედავად იმისა, რომ ჩვენი ამოცანაა, ამ საფრთხეს წინააღმდეგობა საქართველოს ევროპულ და ევროატლანტიკურ გზაზე სვლით გავუწიოთ და სიტუაცია შემოვაბრუნოთ,
ვთვლით, ამ სიტუაციის შესაჩერებლად სწორედ ახლაა საჭირო ლეგიტიმური
ბერკეტებისა და გავლენების გამოყენება. შეთანხმების მიხედვით, რომელსაც
ქართულმა ოცნებამ მოაწერა ხელი, საქართველოს მთავრობა ვალდებული იყო,
ვადამდელი საპარლამენტო არჩევნები ჩაეტარებინა, თუკი მმართველი პარტია ამ
ოქტომბრის ადგილობრივი თვითმმართველობის არჩევნებში 43%-ის აღებას ვერ
მოახერხებდა", — ამბობს ოპოზიცია.

განცხადებას ხელს აწერენ შემდეგი პარტიები:

  • ერთიანი ნაციონალური მოძრაობა;
  • სტრატეგია აღმაშენებელი;
  • ქრისტიან-დემოკრატები;
  • სამოქალაქო ალიანსი თავისუფლებისთვის;
  • გირჩი — მეტი თავისუფლება;
  • საქართველოს რესპუბლიკური პარტია;
  • ევროპელი დემოკრატები;
  • კანონი და სამართალი;
  • ევროპული საქართველო;
  • ლელო საქართველოსთვის;
  • ეროვნული დემოკრატიული პარტია;
  • ტარიელი ნაკაიძე, დამოუკიდებელი დეპუტატი;
  • ელენე ხოშტარია — დროა;
  • თავისუფალი დემოკრატები;
  • მოძრაობა სახელმწიფო ხალხისთვის.