პრემიერმინისტრმა ღარიბაშვილმა თქვა, რომ ევროკავშირის მიერ შეთავაზებული სესხის აღებაზე საქართველომ უარი შეგნებულად და გააზრებულად თქვა, ოპოზიციის მხრიდან ამ გადაწყვეტილების კრიტიკას კი "შეურაცხმყოფელი ტყუილი" უწოდა:

"ბოლო ორი დღეა მაგალითად მიდის კრიტიკა იმის თაობაზე რომ საქართველომ, ვინაიდან ჩვენ შეგნებულად, გააზრებულად, უარი ვთქვით უბრალოდ 75 მილიონი ევროს სესხის აღებაზე და გამოდიან ურცხვად, ატყუებენ მოსახლეობას, თითქოს ეს იყო რაღაც გრანდიოზული დახმარება ევროკავშირის მხრიდან და ვინაიდან მთავრობამ ამაზე, დამატებით სესხის აღებაზე უარი თქვა, მათივე სიტყვებით, მათივე ინტერპრეტაციით ვიტყვი, რომ თითქოს ეს არის უარის თქმა ევროკავშირის წევრობაზე და ინტეგრაციაზე და ზოგადად, კურსზე. რაც, რა თქმა უნდა, ეს არის შეურაცხმყოფელი ტყუილი", — განაცხადა ღარიბაშვილმა.

ის ამტკიცებს, რომ ქვეყანას აქვს რესურსი, ეკონომიკა იმდენად განავითაროს, რომ არ დასჭირდეს პარტნიორების დახმარება.

"ვინაიდან ჩვენ გვაქვს ძლიერი ეკონომიკური ზრდა, გვაქვს დამატებითი რესურსები ბიუჯეტში მილიარდ ორასი მილიონ ლარის სახით, და კიდევ უფრო მეტი გვექნება წლის ბოლოს, ვინაიდან ჩვენი ვარაუდით, პროგნოზებით, ორნიშნა ზრდაზე გავალთ წლის ბოლოს, ამიტომ მთავრობამ გადაწყვიტა რომ უარი ვთქვათ დამატებით საგარეო ვალის აღებაზე", — განაცხადა ღარიბაშვილმა.

გუშინ, 31 აგვისტოს, პრემიერმინისტრმა ირაკლი ღარიბაშვილმა განაცხადა, რომ საქართველო თავს შეიკავებს ევროკავშირისგან მაკროფინანსური დახმარების მეორე ნაწილის აღებაზე. ღარიბაშვილმა ეს გადაწყვეტილება საგარეო ვალის შემცირების სურვილით ახსნა. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროფინანსურ დახმარებას "ფინანსური დატვირთვა აღარ აქვს".

საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

აღსანიშნავია, რომ 24 აგვისტოს, ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროფინანსური დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".

გაიგე მეტი: