ნათია თურნავამ ევროკავშირის მხრიდან საქართველოსთვის 75 მილიონი ევროს მოცულობის მაკროფინანსური მხარდაჭერის მიღების საკითხზე ისაუბრა და განაცხადა, რომ ქვეყანაში არ დგას ამგვარი დახმარების მიღების საჭიროება. მისი თქმით, ეკონომიკის აღდგენის მაღალი ტემპი იძლევა იმის საშუალებას, რომ ამ ტრანშის მიღებით საქართველომ აღარ გაზარდოს საგარეო ვალის მოცულობა.

"მე ვწუხვარ, რომ უფრო მეტად ეკონომიკურმა საკითხმა პოლიტიკური ელფერი შეიძინა. დღეს ჩვენ ვსაუბრობდით, რამდენად მაღალია ჩვენი ეკონომიკის აღდგენის ტემპი. ეს იმას ნიშნავს, რომ ჩვენმა ეკონომიკამ დამატებით 1 მილიარდი ლარი გამოიმუშავა. ანუ, ჩვენ გვაქვს შიდა რესურსი, რომელიც შეგვიძლია, ბევრ პროგრამას და კარგ საქმეს მოვახმაროთ. საგარეო ვალი კი, რომელიც ისედაც გაგვეზარდა პანდემიის გამო, აღარ უნდა გავზარდოთ. აქ ხომ საუბარია არა დახმარებაზე, არამედ საგარეო ვალის გაზრდაზე — ეს არის სესხი. შესაბამისად, თუკი საკუთარი რესურსი გვაქვს, არ არის საჭიროება, რომ გავზარდოთ სესხი", — განაცხადა ნათია თურნავამ.

ამ საკითხზე პრემიერმინისტრა, ირაკლი ღარიბაშვილმაც ისაუბრა და თქვა, რომ მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება.

ქართული ოცნების თავმჯდომარემ, ირაკლი კობახიძემ კი განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".