განათლების მინისტრის, მიხეილ ჩხენკელის განცხადებით, უნივერსიტეტებს უფლება ეძლევათ, რომ სამედიცინო სტუდენტებისთვის ლაბორატორიულ-პრაქტიკული ლექციები დასწრებით ფორმატში ჩაატარონ, მაგრამ იმ შემთხვევაში, თუ ლექტორებიც და სტუდენტებიც ორჯერ აცრილები იქნებიან.

"ერთადერთი გამონაკლისი უნივერსიტეტებში გახლავთ, მედიცინის პროგრამის სტუდენტებისთვის პრაქტიკული, ლაბორატორიული და კლინიკური მეცადინეობები. უნდა აღვნიშნო, რომ თეორიული მედიცინისთვისაც მთლიანად იქნება დისტანციურად 4 ოქტომბრამდე. მანამდე კი უფლებამოსილება ეძლევათ უნივერსიტეტებს, რომ მედიცინის პროგრამის სტუდენტებისთვის კლინიკური, ლაბორატორიული და პრაქტიკული ლექციები აწარმოონ დასწრებული ფორმატით, ოღონდ აქაც არის ძალიან მნიშვნელოვანი დათქმა, რომ ამ აქტივობების დროს, როგორც სტუდენტები, ასევე, პროფესორ-მასწავლებლები უნდა იყვნენ ორჯერ აცრილები", — განაცხადა მან.

საკოორდინაციო საბჭოს გადაწყვეტილებით, სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება. ანალოგიური რეგულაცია გავრცელდება უმაღლეს და პროფესიულ სასწავლებლებზე. ასევე, 4 ოქტომბრამდე შეზღუდული დარჩება სააღმზრდელო დაწესებულებების მუშაობა და ეს ეხება როგორც სახელმწიფო, ისე კერძო ბაღებს.