ჯანდაცვის მინისტრის, ეკატერინე ტიკარაძის თქმით, ვირუსის გავრცელების სტაბილიზაცია ლეტალობის ტენდენციის კლებას არ ნიშნავს და ამ მიმართულებით მათ ნეგატიური მოლოდინი აქვთ.

"სტაბილიზაცია ვირუსის გავრცელების კუთხით ბოლო დღეებში ფიქსირდება, თუმცა ეს არ ნიშნავს, რომ ჩვენ შეიძლება გვქონდეს ამ ეტაპისთვის ლეტალობის ტენდენციის კლების მოლოდინი, ვინაიდან, ეს არის ის შემთხვევები, რომელიც უკვე ჯამურად არის დამდგარი", — განაცხადა მან.

მინისტრი აღნიშნავს, რომ ამ ეტაპზე კლინიკური ჯგუფი თენგიზ ცერცვაძის, ინეზა სულამანიძისა და მარინა ეზუგბაიას მონაწილეობით მაქსიმალურად არის გაძლიერებული, ისინი მუდმივ რეჟიმში იმყოფებიან კლინიკებში და აზუსტებენ მკურნალობის ხარისხის დადგენილ და პროტოკოლით გაწერილ სტანდარტებს.

"ამასთან დაკავშირებით ჩვენ გვაქვს მოლოდინი, რომ ის ლეტალობის მაჩვენებელი, რომელიც საქართველოს მსოფლიოსგან გამოარჩევს და არის 1,32, ჩვენ შევძლებთ გავაუმჯობესოთ, რის შედეგადაც არაერთი სიცოცხლის გადარჩენა მოხდება, თუმცა შემდგომი ორი კვირის მანძილზე აღსანიშნავი არის ის, რომ ჩვენი მოლოდინი არის ლეტალობის მაჩვენებლის კვლევასთან დაკავშირებით ჯერჯერობით ნეგატიური, ანუ არ ველით ჯერჯერობით კლებას", — განაცხადა ტიკარაძემ.

27 აგვისტოს მონაცემებით, საქართველოში კორონავირუსის 4 031 ახალი შემთხვევა დადასტურდა, გამოჯანმრთელდა 4 585, ხოლო გარდაიცვალა — 73 ადამიანი. ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 536 202-ს, მათგან გამოჯანმრთელდა — 473 502, ხოლო ვირუსს ჯამში ემსხვერპლა 7 101 ადამიანი.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები