თბილისის მერის, კახა კალაძის განცხადებით შეიმუშავეს ელიავას ბაზრობის განვითარების გეგმა. ის ამბობს, რომ ეს არის ერთ-ერთი მასშტაბურ პროექტი, რომელიც კერძო სექტორთან თანამშრომლობით განხორციელდება.

"მუნიციპალიტეტმა მოლაპარაკებები აწარმოა ტერიტორიის ყველა მესაკუთრესთან და ელიავას ბაზრობის განვითარების ერთიანი პროექტი იქნა შემუშავებული. ეს იქნება ერთ-ერთი დიდი პროექტი, რომელსაც მუნიციპალიტეტის მიერ შედგენილი გეგმარების საფუძველზე კერძო სექტორი, ამ შემთხვევაში, ტერიტორიის მესაკუთრეები თავად განახორციელებენ [...] პროექტი, რომელსაც საბოლოოდ შევიმუშავებთ, გაითვალისწინებს როგორც ქალაქის, ასევე, მესაკუთრეების და იქ მომუშავე ადამიანების ინტერესებს", — განაცხადა კახა კალაძემ.

დედაქალაქის მთავრობის სხდომაზე კალაძემ ისაუბრა იმ პრობლემებზეც, რაც ელიავას ბაზრობასთან დაკავშირებით ამ დრომდე არსებობს.

"მოგეხსენებათ, აღნიშნული ობიექტი ძალიან მნიშვნელოვან ეკონომიკურ ზონას წარმოადგენს, სადაც მრავალი მეწარმე ეკონომიკური საქმიანობით არის დაკავებული. თუმცა, მისი არსებული მდგომარეობა, ვიზუალი, უსაფრთხოება და უსაფრთხოება მნიშვნელოვნად ჩამორჩება დღევანდელ თბილისს და სერიოზულ პრობლემას წარმოადგენს როგორც იქ მომუშავე ადამიანებისთვის, ისე, ზოგადად, ქალაქში მცხოვრები ადამიანებისთვის. არავის არ მოსწონს დღევანდელი ელიავას ბაზრობის არსებული მდგომარეობა. იქ, უსაფრთხოების თვალსაზრისით არსებული ვითარება სერიოზულ პრობლემას წარმოადგენს. შესაბამისად, იმ ტერიტორიის ასე დატოვება ჩვენთვის კატეგორიულად მიუღებელია", — განაცხადა კახა კალაძემ.