გირჩის ლიდერის, იაგო ხვიჩიას განცხადებით, არჩევნების გადადების ინიციატივა ოპოზიციიდან არ უნდა მოდიოდეს, რადგან ეს წინასწარ დამარცხებას ნიშნავს. მისი თქმით, არ სურს ამ არჩევნებზე ქართულ ოცნებას ჰქონდეს ტრიუმფალური გამარჯვება.

"ოპოზიციის მხრიდან არ უნდა მოდიოდეს არჩევნების გადადების ინიციატივა, იმიტომ, რომ მაინც არავინ არ გადადებს და ოპოზიცია გავა დამარცხებული ამ არჩევნებზე, წინასწარ, რომელსაც არ უნდოდა ამ არჩევნების ჩატარება და ფაქტობრივად, ქართულმა ოცნებამ ძალით ჩაატარებინა მაშინ, როდესაც ოპოზიცია თავს სუსტად გრძნობდა. ეს არ მინდა, რომ მოხდეს, მე მინდა, რომ ამ არჩევნებზე ხელისუფლებას არ ჰქონდეს ტრიუმფალური გამარჯვება", — თქვა ხვიჩიამ TV პირველის ეთერში.

მისივე თქმით, თუ ხელისუფლების შეცვლის სურვილი არსებობს, სახალხო დამცველის აზრი, ქვეყანაში არსებული ეპიდვითარების გამო არჩევნების გადადების შესახებ, არ უნდა იყოს გათვალისწინებული.

"ჩვენ, ადამიანებმა სულ უნდა გავაკეთოთ არჩევანი სხვადასხვა რისკებს შორის და გადავდგათ ნაბიჯები, თუ ცხოვრების გაგრძელება გვინდა, აქედან გამომდინარე, თუ მართლა გვინდა, რომ ქვეყანაში რამე შეიცვალოს, უკეთესი ხელისუფლება მივიღოთ, სადღაც წინ წავიდეთ, მაშინ სახალხო დამცველს კი არ უნდა დავუჯეროთ და დამარცხებული კი არ უნდა გავიდეთ არჩევნებზე, არამედ ყველაფრის მიუხედავად, ყველა წესების დაცვით, ორჯერ აცრილები და ამას მოვასწრებთ, ჩემი აზრით", — აღნიშნა ხვიჩიამ.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. ამ საკითხზე პარტიის ერთ-ერთმა ლიდერმა, მამუკა მდინარაძემ ისაუბრა და განაცხადა, რომ ოპოზიციას არჩევნებში მონაწილეობა მაინც მოუწევს.