საქართველოში კორონავირუსის გავრცელების მეოთხე ტალღისას, მაშინ, როცა მთავრობამ მორიგი რეგულაციები გაავრცელა, წესების დაცვის აუცილებლობაზე პატრიარქიც ალაპარაკდა. ილია II-ს ბრძანებით, 14 აგვისტოდან სამი კვირის განმავლობაში ეკლესია-მონასტრებს კურთხევა ეძლევათ, უზრუნველყონ, რომ ტაძრებში დაცული იყოს დისტანცია, პერიოდულად ჩატარდეს იატაკის დეზინფექცია, მრევლმა იქონიოს პირბადე და სიტკბოების მიღებისთვის გამოიყენონ ერთჯერადი ჭიქები.

"ამა წლის 14 აგვისტოდან, სამი კვირის განმავლობაში, პანდემიის პრობლემიდან გამომდინარე, ყველა ეკლესია-მონასტერს ეძლევა კურთხევა, უზრუნველყონ (როგორც ადრე), რომ ტაძრებში დაცულ იქნეს დისტანცია, პერიოდულად ჩატარდეს იატაკის დეზინფექცია და მრევლმა იქონიოს პირბადე, ხოლო სიტკბოების მიღებისთვის გამოყენებულ იქნეს ერთჯერადი ჭიქები", — აცხადებს პატრიარქი.

აღსანიშნავია, რომ საპატრიარქო ხშირად ეწინააღმდეგებოდა ექიმებისა და ეპიდემიოლოგების რეკომენდაციებს და არღვევდა სახელმწიფოს დაწესებულ რეგულაციებს, რომელთა მიზანი ვირუსის გავრცელების შემცირება იყო, მეტიც ამის უფლებას საპატრიარქოს თავად სახელმწიფო აძლევდა.

პანდემია და საქართველოს საპატრიარქო

მას შემდეგ, რაც საქართველოში კორონავირუსი გავრცელდა, ნაციონალური მოძრაობის ლიდერმა, რომან გოცირიძემ საპატრიარქოს შესთავაზა, რომ პრევენციისთვის, ზიარებისას ერთჯერადი კოვზებით ესარგებლათ. მსგავსი რჩევა ჰქონდა დაავადებათა კონტროლის ცენტრისა და ინფექციურ საავადმყოფოს დირექტორებსაც, თუმცა რელიგიურ რიტუალზე რეკომენდაციის გაცემაზე უარს ამბობდნენ. საპატრიარქომ განაცხადა, რომ სიცოცხლისთვის საშიში დაავადება არაერთხელ გავრცელებულა და ეს რჩევა არ გაითვალისწინა. მათ მხოლოდ ის ცვლილება შეიტანეს, რომ მრევლს უფლება მისცეს ზიარების შემდგომ სასმელი (სიტკბოების) ერთჯერადი ან საკუთარი ჭიქით მიიღონ.

"ეკლესიის წევრებისათვის ზიარების საიდუმლოების არსში დაეჭვება და მოქმედებით ამის გამოხატვა; მაგალითად: საზიარებელ საერთო კოვზზე უარის თქმა, როგორც ინფექციის გადამყვან წყაროზე, ყოვლად მიუღებელია", — წერია სინოდის 20 მარტის განჩინებაში.

რაც შეეხება ტაძარში მორწმუნეთა სიმრავლისა და საეკლესიო რიტუალების უსაფრთხოებას კორონავირუსის პანდემიის დროს, სინოდმა განაცხადა, რომ "ეკლესიის ყველა საიდუმლოება სულიწმინდის მოწმედების სფეროა", სადაც აღესრულება "ღვთაებრივი სასწაულები".

საეკლესიო რიტუალებს საპატრიარქო კომენდანტის საათის დროს ატარებდა, მაშინაც კი, როდესაც ხალხმრავალი შეკრებები აკრძალული იყო.