გაეროს ბავშვთა ფონდის (UNICEF) ორგანიზებით ექიმი ბიძინა კულუმბეგოვი და ჯანდაცვის სხვა ექსპერტები ახალციხეში 60-მდე მასწავლებელსა და სკოლის ადმინისტრაციის წარმომადგენლებს შეხვდნენ და კორონა ვირუსისა და ვაქცინაციის შესახებ მიაწოდეს ინფორმაცია. UNICEF-ის ინფორმაციით, შეხვედრის შემდეგ მათი უმეტესობა აიცრა.

საქართველოში UNICEF-ის წარმომადგენელმა, ღასან ხალილმა ვაქცინაციის პროცესში რაც შეიძლება მეტი მოქალაქის ჩართვას, განსაკუთრებით კი, მძიმე ეპიდემიოლოგიური ვითარების ფონზე პედაგოგების აქტიურობის მნიშვნელობას გაუსვა ხაზი.

"პანდემიის წინა ხაზზე მომუშავე ძირითადი პერსონალის, როგორებიცაა მასწავლებლები და სკოლების ადმინისტრაციის თანამშრომლები, ვაქცინაცია ძალიან მნიშვნელოვანია სკოლებში და სხვა საგანმანათლებლო დაწესებულებებში უსაფრთხო გარემოს მისაღწევად", — განაცხადა მან.

იუნისეფი მუდმივად მართავს მსგავსი ტიპის შეხვედრებს, რითაც ხელს უწყობს დამსწრეების ინფორმირებას და კოვიდ-19-ის საწინააღმდეგო ვაქცინაციას სხვადასხვა ჯგუფებში — მასწავლებლებში, ექიმებში, რელიგიურ ლიდერებსა და საზოგადოების სხვა წარმომადგენლებში. ივლისის ბოლოს მსგავსი ტიპის შეხვედრა გაიმართა მაღალმთიან აჭარაში, რის შემდეგაც 200-ზე მეტი მასწავლებელი აიცრა.