ტელეკომპანია რუსთავი 2-ის გენერალურმა დირექტორმა ნიკა გვარამიამ დღეს, 11 მარტს, რუსთაველის გამზირზე არხის მხარდასაჭერ აქციაზე შეკრებილებს სიტყვით მიმართა.

გვარამიამ მოუწოდა ყველას, რომ მოითხოვონ რუსთავი 2-ის საქმეზე მომუშავე მოსამართლეებისა და უზენაესი სასამართლოს თავმჯდომარის გადაყენება:

"ჩვენ ვითხოვთ სამარცხვინო გამყიდველების გადადგომას, ესენი არიან უზენაესი სასამართლოს თავმჯდომარე ნინო გვენეტაძე, მოსამართლეები ეკატერინე გასიტაშვილი, პაატა ქათამაძე, ბესარიონ ალავიძე, მზია თოდუა, ზურაბ ძლიერიშვილი, ვასილ როინიშვილი, მაია ვაჭარაძე, გიორგი შავლიაშვილი, ნატალია ნაზღაიძე, ნათია გუჯაბიძე და შორენა ყაველაშვილი. ჩვენ ვითხოვთ რომ ეს ხალხი წავიდეს სასამართლოდან, ისინი არ ასრულებენ კონსტიტუციურ ფუნქციას".

არხის დირექტორმა სტრასბურგის სასამართლოს გადაწყვეტილების მნიშვნელობაზეც ისაუბრა:

"ქართველ ხალხს არ მოწონს რომ ჩვენ გადავუხვიეთ ევროპული გზიდან, ამიტომ ძალიან მნიშვნელოვანი რამ მოხდა ამ დღეებში, როდესაც ჩვენ არ წავედით ევროპისკენ, ევროპა წამოვიდა ჩვენკენ. დღეს არის დიდი ევროპული დღე. დღეს არის იმ ძალების დამარცხების დღე, რომელებიც სხვაგან ექაჩებიან ამ ქვეყანას. ეს ძალები ვერასდროს ვერ გაიმარჯვებენ რადგან თქვენ არაერთგზის თქვით რომ თქვენი არჩევანი არის ევროპა და ევროატლანტიკური სივრცე. საქართველო აუცილებლად გახდება ევროპის ნაწილი. ყველა ვინც ამას წინ აღუდგება იქნება ისტორიის სანაგვეზე".

რუსთაველის გამზირზე, პარლამენტის შენობის წინ ტელეკომპანია რუსთავი 2-ის მხარდასაჭერი აქცია-კონცერტი მიმდინარეობს.

აქციას ესწრებიან არასამთავრობო ორგანიზაციებისა და მედიის წარმომადგენლები, ასევე სხვადასხვა პოლიტიკური პარტიის წევრები და არხის მხარდამჭერი მოქალაქეები.