ბუნებრივი აირის ფასის შესაძლო მატებასთან დაკავშირებით, ენერგეტიკის მინისტრმა, კახა კალაძემ განაცხადა, რომ ლარის კურსის გაუფასურების გამო, შესაძლოა, ტარიფი გაიზარდოს. მისივე თქმით, იმ შემთხვევაში, თუ ტარიფი მოიმატებს შესაძლოა, მიზნობრივი სუბსიდირება განხორციელდეს:

"შეიძლება განვიხილოთ იმ შემთხვევაში თუ ტარიფის მატება იქნება ბუნებრივ აირზე, მე არ ვამბობ რომ აუცილებლად იქნება, ამას მარეგულირებელი დაადგენს, მაგრამ იმ შემთხვევაში თუ იქნება, შესაძლებელია, ვისაუბროთ მიზნობრივ სუბსიდირებაზე, როგორც ეს ელექტროენერგიის ნაწილში გვაქვს. ბუნებრივი აირი არის სრულად იმპორტირებული ჩვენი მეზობელი ქვეყნებიდან, ხდება უცხოურ ვალუტაში გადახდა, დოლარით ხდება მისი ყიდვა და საქართველოში მოსახლეობაზე ხდება ეროვნულ ვალუტაში მისი გასაღება. ასე რომ, არის ტარიფების გაზრდის შესაძლებლობა, თუმცა, დაველოდოთ მარეგულირებელი კომისიის გადაწყვეტილებას. ეს მხოლოდ და მხოლოდ გამოწვეულია კურსის ცვალებადობით".

ენერგეტიკისა და წყალმომარაგების მარეგულირებელმა ეროვნულმა კომისიამ (სემეკი) 9 მარტს, შპს ყაზტრანსგაზ თბილისისათვის ბუნებრივი გაზის მოხმარების ტარიფების დადგენის მიზნით საჯარო ადმინისტრაციული წარმოება დაიწყო. ამავე სხდომაზე, იგივე მიზეზით, დაიწყო საჯარო ადმინისტრაციული წარმოება შპს საქართველოს გაზის ტრანსპორტირების კომპანიისთვის. სემეკის გადაწყვეტილება ტარიფის შესახებ, მიმდინარე წლის ივლისის ბოლოს გახდება ცნობილი.