საოკუპაციო რეჟმის მიერ უკანონოდ დაკავებული ზაზა გახელაძე თავისუფალია. ის რამდენიმე წუთის წინ გადმოვიდა თბილისის მიერ კონტროლირებად ტერიტორიაზე და სახლში წავიდა. მანამდე მან მედიასთან მოკლე კომენტარი გააკეთა:

"კარგად ვარ. არ ველოდებოდი რომ ასე მოხდებოდა, დღეს ყოველ შემთხვევაში. ღმერთის წყალობით, ჩვენი პატრიარქის წყალობით და ჩვენი მთავრობის გვერდზე დგომით, დღეს კარგად ვარ. კარგად ვარ, დღეს მითუმეტეს კარგად არის ყველაფერი.

მივესალმები აქედან [ოჯახს]. დეტალურად რომ მოვყვე ყველაფერი, ერთი დღე აქ დგომა მოგვიწევს და სახლში დარწმუნებული ვარ ჩემი შვილები მიყურბენ. მოდი ხვალ, ზეგ, მაზეგ... არსად წასვლას ჯერ არ ვაპირებ. არც აქ წამოვედი ჩემი ნებით მართალია, მაგრამ... სხვა დროს, ბოდიშს გიხდით".

გახელაძე საოკუპაციო რეჟიმის უკანონო პატიმრობაში ერთი წლის განმავლობაში იმყოფებოდა. ის დღეს დე ფაქტო პრეზიდენტმა, ანატოლი ბიბილოვმა შეიწყალა. საოკუპაციო რეჟიმის სააგენტო, ბიბილოვის კომენტარს ავრცელებს, სადაც აღნიშნულია, რომ გახელაძე რუსეთის პატრიარქის, კირილის თხოვნით გაათავისუფლა. რამდენიმე კვირის წინ კირილს საქართველოს პატრიარქმა, ილია მეორემ მიწერა და გახელაძის გათავისუფლებაში დახმარება სთხოვა.

გარდა ამისა, რესი წერს, რომ გახელაძე საქართველოში მყოფ პატიმარში, გობოზოვში გაცვალეს. ამის შესახებ დასმულ კითხვას ერგნეთში მყოფმა პრემიერმინისტრმა არ უპასუხა.

"ძალიან ბევრ ვერსიას მოისმენთ, მაგრამ, მე გთხოვთ ყველას, რომ ვერსიებს აღარ მოუსმინოთ, ჩვენ შევხედოთ შედეგს. შედეგი არის ის, რომ ზაზა არის თავისუფალი", — განაცხადა მან.

ერთი წლის წინ გახელაძე კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: