პრემიერმინისტრის ბრიფინგის შემდეგ ჟურნალისტებს ქართული ოცნების თავმჯდომარე ესაუბრა და იგივე მესიჯბოქსი გაიმეორა, რაც პრემიერმა. ღარიბაშვილის მსგავსად, ირაკლი კობახიძე ესკლესიას "გამოესარჩლა" და მედიის წარმომადგენლები ანტიეკლესიურ ძალებად მოიხსენა.

გარდა ამისა, ღარიბაშვილის მსგავსად, მათ უკან ოპოზიციური ძალები დაინახა და ღარიბაშვილის მსგავსადვე მედიის წარმომაგენლები დაადანაშაულა იმაში, რომ ადამიანის ტრაგედია "პოლიტიკური მიზნების მისაღწევად" გამოიყენეს.

"გუშინდელი მიტინგის ორგანიზატორები იყვნენ რადიკალური ანტიქრისტიანული დაჯგუფებები. პირდაპირ შემიძლია ეს გითხრათ. ამ დაჯგუფებების ლიდერები არიან მათ შორის ის ადამიანები, ვინც ჩამოვთვალე, ნოდარი, ჭუტა, გვარამია და ა.შ.

ამაში შედიან სირცხვილია და ასე შემდეგ და ამაში შედიან, რა თქმა უნდა, ის პოლიტიკური ძალები, რომელთა კოორდინაციითაც მოქმედებენ. ესენი არიან რადიკალური ანტიქრისტიანული დაჯგუფებები, რომელთა მიზანი არის ძალიან მარტივად — დაუპირისპირდნენ სახელმწიფოს, ეკლესიას, მათ აქვთ ამორალური მიზნები, ანტისახელმწიფოებრივი და ანტიეკლესიური", — განცხადა კობახიძემ.

მის შემდეგ, ამავე ტრიბუნასთან დადგა "ოცნების" კიდევ ერთი ლიდერი მამუკა მდინარაძეც, რომელმაც იმავე თემებზე ისაუბრა და იგივე წინადადებებიც კი გამოიყენა. ისიც ამტკიცებდა, რომ რომ მედიის მენეჯერთა ნაწილი ოპერატორის გარდაცვალებას სპეკულაციურად იყენებს. მდინარაძემაც ახსენა ფრაზები ანტისახელმწიფოებირივი და ანტიეროვნული ჯგუფები და ეკლესიასა და "ეკლესიურობის" მნიშვნელობაზე საუბარს დიდი დრო დაუთმო — განაცხადა "შეუბღალავია"და არ შეიძლება ამას ვინმე "დაეჯახოსო".

რაც შეეხება ღარიბაშვილს, დღეს ის სამთავრობო ტრიბუნიდან პატრიარქს "გამოესარჩლა" და გააკრიტიკა ყველა, ვინც მომხდარი ძალადობის გამო მისი პასუხისმგებლობის დაყენება მოითხოვა. როგოც უკვე აღვნიშნეთ, მან საპატრიარქოს კრიტიკას ანტისახელმწიფოებრივი და ანტიეროვნული უწოდა და ბოდიშიც კი მოიხადა იმის გამო, რომ პატრიარქის დაკავებაზე ნათქვამი ფრაზის გამეორება მოუწია.