ქიბარ ხალვაშმა ტელეკომპანია იმედის ეთერში ის პერიოდი გაიხსენა, როცა ტელეკომპანია რუსთავი 2-ის მფლობელი იყო. მისი თქმით, გირგვლიანის თემის გაშუქებამ შეიწირა მისი და რუსთავი 2-ის ურთიერთობა და იქაური მენეჯმენტი.

როგორც მან იმედის ეთერში განაცხადა, მაშინ როცა გირგვლიანის საქმეზე სასამართლოს ბოლო სხდომა იმართებოდა, საქართველოს მაშინდელი პრეზიდენტი, მიხეილ სააკაშვილი ამერიკაში იყო და მაშინდელი ხელისუფლება მიიჩნევდა, რომ მთავარი თემა ვიზიტი უნდა ყოფილიყო.

"გირგვლიანის თემასთან დაკავშირებითაც ვთვლი, რომ არაპროფესიონალურად მოიქცა გუნდი. მაგრამ, მე ვთვლი, რომ იმედს ჰქონდა პრივილეგია, რომ ეს ადრე გაეშუქებინა. აბსოლუტურად არ ყოფილა მითითებას არავისთან [არხის თანამშრომლობა] და ფაქტობრივად, გირგვლიანის თემის გაშუქებამ რუსთავი 2-ში შეიწირა ჩემი და რუსთავი 2-ის ურთიერთობა და იქაური მენეჯმენტი," - აღნიშნა ხალვაშმა.

მისი თქმით, ტელევიზიის სარედაქციო პოლიტიკაში მისი ჩარევა მინიმალური იყო. თუმცა, გაიხსენა შემთხვევა, როცა ქუჩაში აქცია იმართებოდა და მისი სურვილი იყო პირდაპირი ეთერში აღარ გადაცემულიყო.

"ვუთხარი, რომ ეს არ არის ოთხსაათიანი ლაივის თემა და შესაძლოა დაამოკლოთ და საინფორმაციოში გადაიტანოთ… ზუსტად ეგ იყო ჩემი შეცდომა, ეს იყო მთელი დღის ზეწოლის შედეგი – პერსონალურად დამირეკეს მიხეილ სააკაშვილმა და გიგი უგულავამ და ვიფიქრე, რომ განვტვირთავ დაძაბულობას ამათსა და რუსთავი 2-ს შორის,"- აღნიშნა ხალვაშმა, რომელიც აღნიშნავს, რომ აღარ ჩაერევა არხის საქმიანობაში.