ლელოს ლიდერის, მამუკა ხაზარაძის განცხადებით, დეპუტატს იმუნიტეტი საერთოდ არ უნდა სჭირდებოდეს. მისი თქმით, თუ ხვალ დადგება საკითხი, ის მანდატს ჩააბარებს და "უსამართლო მართლმსაჯულების" წინაშე წარდგება. ამის შესახებ მან პლენარულ სხდომაზე ისაუბრა და ასე შეაფასა ქართული ოცნების ახალი ინიციატივა, რომლის მიხედვითაც, დეპუტატისთვის იმუნიტეტის მოსახსნელად საჭირო ხმების რაოდენობის 51-დან 90-მდე უნდა გაიზარდოს.

"მე ვფიქრობ, დეპუტატს საერთოდ არ უნდა სჭირდებოდეს იმუნიტეტი. მიუხედავად იმისა, რომ ჩვენ ქვეყანაში, მე პირადად გეტყვით, რომ მე პირადად განვიცადე და განვიცდი პოლიტიკურ მართლმსაჯულებას, რომელიც ჩემსა და ბადრი ჯაფარიძის საქმეზეა. ამიტომ, ახლავე ვაცხადებ, რომ არანაირი იმუნიტეტით არ ვისარგებლებ და ჩვენ ყველამ უნდა მივაღწიოთ იმას, რომ ქვეყანაში იყოს ნორმალური პროკურატურა, სასამართლო და დეპუტატს არ უნდა სჭირდებოდეს რაღაც იმუნიტეტი, რომ დაიცავს თავი.

როცა ამას მივაღწევთ, მაშინ გვექნება ნორმალური ქვეყანა. ახლა ხმამაღლა ვაცხადებ, კიდევ ვიმეორებ, რომ ჩვენს ქვეყანაში, სამწუხაროდ, არსებობს პოლიტიკური მართლმსაჯულება და მე ამ მიდგომის, მე მესმის, რომ ტრადიცია არსებობს სხვადასხვა ქვეყანაში, მაგრამ ჩვენს ქვეყანაში ასეთი ტიპის კანონმდებლობის და კიდევ გაზრდის წინააღმდეგი ვარ. იმიტომ, რომ ჩვენ ვართ არჩეული ხალხის მიერ და პარლამენტი არ უნდა იყოს ის ადგილი, სადაც შეიძლება დაემალო მართლმსაჯულებას. ამიტომ, მე პირველი ვაცხადებ ამას, რომ მე ვიქნები პირველი, რომ ხვალ თუ ეს საკითხი დადგა, არანაირი კენჭისყრა არ გვჭირდება, არანაირი 90 ან 100 ხმა, მე თვითონ ჩავაბარებ მანდატს, ისევე როგორც ბადრი ჯაფარიძე და ამ უსამართლო მართლმსაჯულების წინაშე წარვდგები. იმიტომ, რომ სიმართლე საბოლოო ჯამში ყოველთვის იმარჯვებს", — განაცხადა მან.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

თიბისი გრუპის 97%-მა ხაზარაძე და ჯაფარიძე ხელახლა აირჩია თავმჯდომარედ და მოადგილედ.

28 ივნისს გავრცელდა ინფორმაცია, რომ თიბისი ბანკის დამფუძნებლები მამუკა ხაზარაძე და ბადრი ჯაფარიძე თიბისის აქციების დაახლოებით 8%-ს დროებით გაასხვისებას აპირებენ. ამის შესახებ განცხადება ლონდონის საფონდო ბირჟაზე გამოქვეყნდა.

გაიგეთ მეტი: რა ვიცით თიბისის საქმეზე — ყველაფერი მოკლედ