საქართველოს ეროვნული ბანკი ე.წ. ფინანსური პირამიდის შესახებ ინფორმაციას ავრცელებს და მოქალაქეებს მისი ამოცნობის გზებს სთავაზობს.

რა არის ე.წ. ფინანსური პირამიდა?

ფინანსური პირამიდის დროს კომპანიები მოსახლეობას, ბაზარზე არსებულ საპროცენტო განაკვეთთან შედარებით, მაღალ სარგებელს სთავაზობს. საქართველო ეროვნული ბანკის ინფორმაციით, მსგავსი ორგანიზაციების მიერ მომხმარებლისთვის დაპირებული სარგებლის გადახდის ერთადერთი გზა ახალი და არსებული წევრებისგან დამატებითი სახსრების მოზიდვაა.

"ყოველ შემდგომ ეტაპზე არსებული ვალდებულებების გასასტუმრებლად სულ უფრო და უფრო მეტი თანხის მოზიდვა ხდება საჭირო. საყურადღებოა ერთი ფაქტორიც - მიუხედავად იმისა, თუ რამდენად წარმატებული ჩანს ასეთი კომპანია დროის რომელიმე მომენტში, სქემა აუცილებლად იშლება როდესაც შეუძლებელი ხდება ახალი წევრის და/ან დამატებითი თანხის მოზიდვა. შედეგად, კომპანია ვეღარ ისტუმრებს წევრების მიმართ არსებულ ვალდებულებებს," - აღნიშნავს ეროვნული ბანკი.

როგორ ამოვიცნოთ ე. წ. ფინანსური პირამიდა?

  • კომპანია მომხმარებელს არსებულ საპროცენტო განაკვეთებთან შედარებით მაღალ საპროცენტო შემოსავალს ჰპირდება;
  • კომპანია ითხოვს ახალი წევრების მიყვანას, ან გარკვეული პროდუქციის რეალურზე გაცილებით მაღალ ფასად შეძენას;
  • კომპანიის მიერ მოზიდული თანხების დაბანდების მექანიზმი და საქმიანობა გაუმჭვირვალეა;
  • კომპანია აწარმოებს მასშტაბურ სარეკლამო კამპანიებს და ხშირად, კლიენტურის გაფართოების მიზნით, კომპანია ატარებს ე.წ. საქველმოქმედო აქციებს.