სომხეთის ყოფილი პრეზიდენტის, რობერტ ქოჩარიანის ბლოკი "Hayastan" ("სომხეთი") სომხეთის ვადამდელი საპარლამენტო არჩევნების შედეგებს არ აღიარებს და მის საკონსტიტუციო სასამართლოში გასაჩივრებას აპირებს. ამის შესახებ რადიო თავისუფლების სომხურენოვან სამსახურს ბლოკის ერთ-ერთმა წარმომადგენელმა, იშხან საღათელიანმა უთხრა.

მედია წერს, რომ სავარაუდოდ, რობერტ ქოჩარიანი ბლოკის შემდგომი ნაბიჯების შესახებ დეტალურად ხვალ, 22 ივნისს დაგეგმილ პრესკონფერენციაზე ისაუბრებს.

ყველა საარჩევნო უბნის წინასწარი მონაცემების დათვლის შედეგად, სომხეთის პრემიერმინისტრის მოვალეობის შემსრულებლის, ნიკოლ ფაშინიანის პარტიამ სამოქალაქო შეთანხმება ვადამდელი საპარლამენტო არჩევნები მოიგო.

ვადამდელი საპარლამენტო არჩევნები სომხეთში გუშინ, 20 ივნისს გაიმართა. სომხეთის ცენტრალური საარჩევნო კომისიის მონაცემებით, 1 281 911 ბიულეტენის დათვლის შემდეგ, ფაშინიანის პარტიამ 53,92% (687 251 ხმა) მიიღო, ხოლო სომხეთის ყოფილი პრეზიდენტის რობერტ ქოჩარიანის ბლოკმა "Hayastan" ("სომხეთი") 21, 04% (268 165 ხმა).

არჩევნებში სულ 25 პოლიტიკური ძალა მონაწილეობდა. დანარჩენმა პარტიებმა და ბლოკებმა პარლამენტის მანდატების მოსაპოვებლად განსაზღვრული 5%-იანი ბარიერი ვერ გადალახეს.

პარლამენტში წარმომადგენლობისთვის ბლოკს ხმების მინიმუმ 7% სჭირდება, ხოლო პარტიას მინიმუმ 5%. ამასთან, საარჩევნო კანონმდებლობის თანახმად, პარლამენტში სულ მცირე სამი პოლიტიკური ძალა უნდა იყოს წარმოდგენილი, რაც მანდატების მიღების შესაძლებლობას აძლევს იმ საარჩევნო სუბიექტსაც, რომელმაც ბარიერი ვერ გადალახა, თუმცა ყველაზე მეტი ხმა მიიღო.

არჩევნებში აქტივობამ 49,4% შეადგინა.

რიგგარეშე საპარლამენტო არჩევნების სომხეთში რამდენიმეთვიანი პროტესტი უძღოდა წინ. პროტესტისა და სამხედროების მოთხოვნის შემდეგ, სომხეთის პრემიერმინისტრი, ნიკოლ ფაშინიანი 25 აპრილს გადადგა. ფაშინიანმა განაცხადა, რომ თანამდებობიდან გადადგებოდა და ვადამდელ არჩევნებს დათანხმდებოდა, თუ პრემიერმინისტრობის სხვა კანდიდატებს არ წარადგენდნენ, რაც პარლამენტის დაშლასა და რიგგარეშე არჩევნების დანიშვნას გამოიწვევდა. შეთანხმების მიხედვით, სომხეთის პრეზიდენტმა ვადამდელი არჩევნები 20 ივნისს ჩაინიშნა.

ფაშინიანის გადადგომის მოთხოვნით საპროტესტო ტალღა მას შემდეგ გააქტიურდა, რაც მთიანი ყარაბაღის მეორე ომი საერთო შეთანხმებით დასრულდა და რეგიონზე კონტროლი აზერბაიჯანს გადაეცა. ომის შედეგს სომხური მხარე დამარცხებად აღიქვამდა.