ქართული ოცნების თავმჯდომარე, ირაკლი კობახიძე კითხვაზე, არის თუ არა მისთვის ღმერთი ბიძინა ივანიშვილი, ამბობს, რომ ღმერთი არის ერთი.

"ბიძინა ივანიშვილს აქვს კონკრეტული დამსახურება და ძალიან დიდი დამსახურება სხვადასხვა მიმართულებით. ერთი არის ქველმოქმედება, ყველამ კარგად იცის მასშტაბი ამ ქველმოქმედების, 3 მილიარდზეა საუბარი. 3 მილიარდი ვიღაცებს შეიძლება მოპარული ჰქონდეთ, მაგრამ დახარჯული 3 მილიარდი საქართველოში არავის არ აქვს. ჩვენ გვახსოვს წინა ხელისუფლების დამოკიდებულება, რომელიც იპარავდა, 3 მილიარდი და მეტიც აქვთ მოპარული და მეორე მხარეს იყო, მმართველი პარტიის სათავეში ადამიანი, რომელსაც 3 მილიარდი მხოლოდ ქველმოქმედების სახით აქვს დახარჯული. მეორე ძალიან დიდი დამსახურებაა, რომ ის იყო დემოკრატიული გარდატეხის ავტორი 2012 წელს", — განაცხადა კობახიძემ TV პირველის ეთერში.

მისივე მტკიცებით, ივანიშვილი იყო მოჭადრაკე ქართულ პოლიტიკაში, ვინაიდან მას 7-8 სვლის გათვლა შეეძლო წინასწარ და თუ ავიღებთ ფეხბურთის ან ჭადრაკის სტანდარტებს პოლიტიკაში, ივანიშვილი არის პელეც და გროსმეისტერიც.