საქართველოს იუსტიციის მინისტრმა, თეა წულუკიანმა საზოგადოებრივი მაუწყებლის გადაცემა მთავარში ე.წ. ციანიდის საქმესთან დაკავშირებით, კიდევ ერთხელ თქვა, რომ ხელისუფლებამ თავიდან აირიდა ტრაგედია.

„როდესაც კონკრეტულ კითხვებამდე მიდგა საქმე, პატიმარმა [დეკანოზი გიორგი მამალაძე] უკვე უარი თქვა პროკურორთან შეხვედრაზე, შემოთვალა რელიგიური წყევლა და ამით შემოიფარგლა, ეს მისი უფლებაა," - აღნიშნა წულუკიანმა, რომლის თქმითაც, მოქმედი ხელისუფლება ყველაფერს გააკეთებს იმისთვის, რომ ილია მეორე მართლმადიდებლური ეკლესიის პატრიარქი "რაც შეიძლება დიდხანს" იყოს.

"ამ ბოლო დღეებში, ბევრს ვუსმენთ ერთ-ერთ მეუფეს [მიტროპოლიტი პეტრე] დასავლეთ საქართველოდან, ყველა არხზე და თითქოს, ტენდენციაც არის, რომ არავინ მას არ უნდა დაეთანხმოს, რომ თითქოს შეტევაზეა, ის მართლაც შეტევაზეა, მაგრამ ეს არ არის მთავარი. მე მას ყველა ეთერში მართალი გითხრათ ვერ ვუსმინე, ამას მოთმინება სჭირდება, რომელიც მე ასეთი დოზით არ მაქვს," - აღნიშნა იუსტიციის მინისტრმა.