ყოფილი პრემიერმინისტრისა და პარტია საქართველოსთვის ლიდერის, გიორგი გახარიას განცხადებით, ის ქართული ოცნების დამფუძნებელს, ბიძინა ივანიშვილს "არ აღმერთებდა". ამის შესახებ მან TV პირველის ეთერში ისაუბრა და ასე უპასუხა ჟურნალისტის კითხვას "ბიძინა ივანიშვილი არ არის მესიაც და კულტიც?"

"ჩემთვის არ არის. არ არის ეს ყველაფერი ასე მარტივი. არა, რა თქმა უნდა, არ ვაღმერთებდი და მე თუ მის მიმართ პატივისცემა მქონდა, ეს ჩემს მიერ აღიარებული პატივისცემა იყო", — თქვა მან.

გახარიამ 29 მაისს პარტიისა და გუნდის პრეზენტაცია გამართა. პარტიას საქართველოსთვის ჰქვია. 18 თებერვალს ის პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო. 22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.